2019-20 a Mizorama khualzin nuai 1.60 zinga 80% zin khawthawng an ni - Tourism Minister

Governor Dr Hari Babu Kambhampati chuan nimin khan Raj Bhavan-ah Tourism minister Robert Romawia Royte, Tourism department leh NHIDCL hotute a kâwm. Minister chuan, kum 2019-20 chhungin Mizoramah khualzin 1,60,000 vel an lut a, chu'ng zinga 80% chu zin khawthawng an nih thu a sawi.

Governor chuan, Tourism department hmalakna a phûrpui thu leh hna ṭha tak Mizoram tan an thawka a hriat thu a sawi a; project hrang hrang an kalpui mek te, sorkar laipuia project an thehluhte leh hma thar lak an tumnate hriat chian a duh tih a sawi.

Mizorama tourism tihhmasawn chungchangah Union Tourism minister G Kishan Reddy leh director general (tourism) Ganji Kamala Vardhana Rao te a hmu tawh tih sawiin Larsap chuan, "An inhawng hle. Mizorama tourist site-te awlsam zawka Lengpui Airport aṭanga tlawhpawh a nih theih nan UDAN scheme hnuaiah helicopter service a dil theih," a ti a, ngaihven turin Tourism department hotute a chah.

Minister Robert Romawia chuan, Lengpui Airport leh ILP check-na hmun hrang hrang aṭanga a lan danin, kum 2019-20 chhungin Mizoramah khualzin 1,60,000 an lut tih sawiin, "Heng zinga 80% chu zin khawthawng an ni a, 10% chu sumdawnna leh hna kaihhnawiha rawn zin an ni a, a bak chu adventure neih duh avanga rawn zin leh sakhaw thila rawn zinte an ni," a ti.

Miniter chuan, Governor leh Chief Minister-te'n Mizorama tourism a hlawhtlin theih dan an phûrpui chu vanneihthlak a tih thu sawiin, "Responsible Tourism Policy 2020 siam a ni tawh a, policy hnuaiah hian awmze nei takin Mizoram tourism huanga hmalakna kalpui a ni dawn," a ti a; ram leilung leh ramngawte tichhe lo thei ang ber tur leh khualzinte hîpna hmun buatsaihnaa chengte eizawnna tur thlengin ruahmanna siam a nih thu a sawi.