Thisen pe College of Veterinary Sciences & Animal Husbandry, Selesih NSS chuan nimin khan an college hall-ah thisen pek an huaihawt a, Civil Hospital, Aizawl tan thisen unit 55 an pe a, petute mipa 34 leh hmeichhia 21 an ni. 

Kawlphetha awm dawn lo Power & Electricity department chuan vawiin hian 33KV indoor sub-station-ah hna an thawh dawn avangin zing dar 9 aṭanga tlai dar 5 thleng kawlphetha an titawp dawn a, mipui hriatthiamna an ngen. Kawlphetha nei lo turte chu - Aizawl Venglai, Armed Veng, Chaltlang ṭhenkhat, Chanmari, Chhinga Veng, Dawrpui, Electric Veng, Laipuitlang, Ramthar Veng, Tuikual ṭhenkhat, Tuithiang, Zarkawt leh Treasury Square-te a ni.


Mit entirna Eye Care Hospital chuan Hnahthial Hospital-ah ni thum chhung a thlàwna mit entirna, Free Eye Check-Up Camp (Phaco-Cataract Surgery) an buatsaih a, mi 300 chuang inentirin, mit naute pâw mi 30 chuang an zai.

ECG khawl hlân Health minister Dr R Lalthangliana chuan nimin khan Hnahthial Hospital hnenah ECG khawl a hlân. ECG khawl hi Boeing company-in Mizoram tana khawl 60 an pek aṭangin Hnahthial damdawi-in tan pakhat pek a ni a; Boeing-in khawl 60 an pek tur zinga pali chu tun kar tìr khan Delhi aṭangin Health Minister-in a rawn hawn a ni.

Home ṭanpui Human Resource Development Board vice chairman L Thangmawia, MLA chuan nimin khan Ephatha Society of Mizoramin bengngawng leh ṭawng thei lote enkawlna an din, Ephatha Special School, Kulikawn a tlawh a, computer leh printer pakhat ve ve a pe. L Thangmawia chuan, Ephatha Special School ṭanpui nan SEDP aṭangin Rs 2,00,000 ruahman a nih thu a sawi. 

A thlawna inentirna Indian Medical Association, Mizoram Government Doctors Association leh Indian Dental Association-te chuan May 12-13 chhung khan Kawrtethawvengah 'Zoram dung leh vang fang chhuakin' tih an kalpui kal zelah Special Multidisciplinary Clinic an buatsaih. Doctor 24 leh anmahni puitu mi 10-te'n mi 22,102-te hriselna dinhmun an endik a, damdawi cheng nuai khat chuang man a thlâwnin an sem a ni.