Video darh vanga police suspend sût turin ZPM-in sorkar an phût

ZPM party chuan thuchhuah siamin, tui nú video darh vanga Saipum bula ramri venga duty police zinga suspend chu a rang lama sût turin Mizoram sorkar an phût.

ZPM chuan, tun hnaiah Saipum bula ramri vengtu police pahnih chu an tui chawi lai video darh chungchanga sorkar chêt dan chuan sipaite harsatna a chingfel lo tih an tarlang a, "Ram himna tura vengtu sipaite'n a bika enkawlna an mamawh tehlul nen, an ni tin khawsakna atana ṭul ngei ngei pawh ngaihtuahsak an ni lo fo hi pawi kan ti hle. Sipaite hian dan anga thil tih sual an nei pawha a lan loh laia hrem an nihna hi a rang lama sût nghal turin sorkar kan phût a ni," an ti.

Mizoram leh Assam ramri hun rei tak a buai tawh a, silai hial hmeh puah a ni tawh tih sawiin ZPM chuan, "Vawiin thlenga kan ramri buai chingfel tura hmalakna lian tham awm lo hi kan sorkarin NEDA lama an thawhpuite a vènthâwn vang nge? Mizoram chhunga Assam lei dawh kan sorkarin ngawi rengin a thlir a, ram neitute tawrhna zozai hi engtin nge kan sorkar hian a enliam theih?" an ti a; chak zawka hma la turin Mizoram sorkar an phût a ni.