Hmasawnna atan kan rama awm sate hman thiam a pawimawh - CM
Mizoram Engineering Service Association (MESA) chuan May 14, Inrinni khan Berawtlang Multipurpose Hall-ah golden jubilee an lawm a; an hun hmanpuitu chief minister Zoramthanga chuan, ram hmasawnna turin ram chhunga awm sate hman thiam a pawimawh thu a sawi.
MESA president Lalropuia kaihhruai inkhawmah hian Chief Minister chuan, MESA-in kum 50 an tlinna chu an hmabak atan chona ni se a duh thu sawiin, "Ram hmasawnna atana pawimawh pakhat chu tuna kan rama awm sa hmang thiam a, kan neih sate ṭangkai lehzuala hmanga ram hmasawnna atana chantir thiam a ni," a ti.
CM Zoramthanga chuan, Mizoramin ṭangkai taka hman theih human resource (mihring), mipui châwm zo khawpa ram zau, sik leh sa nuam, ruahtui ṭha leh thil dangte a nei tih sawiin, "Chung asset-te chu kan ngaihtuahna leh kan thil thlir dan kan tihdanglam chuan nasa takin hma a sâwnpui theih," a ti a, kawlphetha lamah theihna la hâi chhuah loh a awm thu a sawi.
Chief Minister chuan, MESA member-te chu an hna ṭheuh theihtawp chhuaha thawk tura chahin, "Mizoram hmasawnna atan in thiamna leh remhriatnate hmangin, ram nuam takah kan ram hi kan siam thei a ni tih i hre reng ang u. MESA golden jubilee hi hmasawnna lungphûm pawimawh tak a nih ngei ka beisei," a ti.
Jubilee lawmnaah hian MESA dintute zinga mi P Lalchhunga'n MESA Directory a tlangzarh a, MESA hruaitute chawimawina hun leh member thi tawh mi 76 sûnna hun hman a ni.
MESA hi May 14, 1972-ah din a ni a, Mizoram union territory a nih hnuah Assam Engineering Service Association aṭanga inla hrangin MESA an din a ni. Engineering degree nei, sorkar department hrang hrang leh hmun danga thawk member ni duhte a huam.
PWD, PHE, Power & Electricity, Irrigation & Water Resources, Higher & Technical Education, Rural Development, UDPA leh Police hnuaia thawkte leh private-a thawk engineer leh architect-te an tel a, member 383 an awm mek. Member pension tawh 31, member thi tawh (service lai leh pension tawh) 76 leh member ni ṭhin, tuna ni tawh lo 31 an awm bawk.