MPCB action plan tihhlawhtlin a la ni lo

National Green Tribunal (NGT)-in February 5, 2021-a India rama state hrang hrang pollution control board-te tihlen leh thuam chakna tur action plan siamna tur thupek a chhuah hnuah Mizoram Pollution Control Board (MPCB) chuan Mizoram sorkarah an mamawhte an thehlut tawh a, tihhlawhtlin a la ni lo.

Action plan-ah hian, post ruak hnawhkhah te, pollution vènna atana hmanraw mamawh lei leh laboratory tihchangtlun te, hun pum (full time)-a thawk tur chairman leh member secretary ruat te, regional officer, engineer leh scientist lakte a tel a ni.

MPCB hotute chuan Vanglaini palai zawhna chhangin, NGT thupek angin state sorkarah MPCB action plan an thehluh tawh thu an sawi a, "Kan mamawhte chu Environment Forest & Climate Change department kaltlangin state sorkarah kan thlen a, thui tak a la kal rih lo," an ti a; MPCB tichak turin sorkar laipui, Central Pollution Control Board leh Mizoram sorkarah an bawhzui zel thu an sawi.

Tarlan tawh angin, July 2021-a Vanglaini palaiin a kawmnaah, MPCB hotute chuan February 5, 2021-a NGT thupek angin state sorkarah NGT thupek chhuah aṭanga thla ruk chhung ngeiin MPCB tihlen leh thuam chakna tur action plan siam a ṭul thu Mizoram sorkarah an thlen tih an sawi a, "NGT thuchhuak ang chuan, state PCB tihlen leh thuam chak hi eng mahin an dâl tur a ni lo, a dâl theih dan leh thupek dangte chu NGT Act, 2010-in a paihthla vek tih state sorkar hnenah hrilh a ni," an ti.