MADC sorkar thar a la awm thei lo ; May 18-ah chairman thlan a ni dawn

Mara Autonomous District Council (MADC) inthlanpui a zawh hnuah nimin tlai thleng khan sorkar siam thei an la awm lo a, sorkar thar a la ding thei lo. MADC chairman thlan hun atan Governor-in May 18, 2022 (Nilaini) a ruat.

Siaha aṭanga Vanglaini thu dawn danin, May 5, 2022-a MADC inthlana MDC nei political party pathum - BJP, MNF leh Congress party-te chu sorkarna siam tumin an inbe kual a, mahse, an la inrem thei lo. Nimin thleng khan political party-te hian sorkarna siam tumin hma an la a ni.

District Council & Minority Affairs secretary Maria CT Zuali chuan notification tichhuakin, MADC chairman tur thlan hun atan Governor-in May 18, 2022 a ruat tih a tarlang.

Maria CT Zuali tarlan danin, MADC chairman inthlana chuh tumte tan chuan May 17, 2022 tlai dar 3 thleng hming pek theih a ni dawn. Chairman thlanna chu Governor-in protem chairman atana a ruat K Hrahmo-a'n a kaihruai dawn a ni.

Tarlan tawh ṭhin angin, MADC-a MDC seat 25 awmah BJP-in seat 12, MNF-in seat kua leh Congress party-in seat pali an la a; sorkarna siam tura MDC neih ngai zat 13 nei phak an awm lo.