MADC-ah sorkar nghet leh ṭha tak Ding se kan duh - Congress party

Mizoram Pradesh Congress Committee (MPCC) Media department hotute chuan May 14, Inrinni khan Aizawl Press Club-ah thuthar thehdarhtute an kâwm a, Congress party chuan Mara Autonomous District Council (MADC)-ah sorkar nghet leh ṭha tak ding se an duh thu an sawi.

MPCC Media chairman Dr Lallianchhunga chuan, Congress party leh BJP-te chu India rama political party lian ber leh inep na ber pahnih, policy pawh inang lo an nih thu sawiin, "BJP chu sakhaw tih bik nei a nih laiin Congress party chu sakhaw tih bik nei lo, sakhaw tin leh hnam tin lenna a ni. Chuvangin, BJP nena sorkarna siam dun hrim hrim hi thil tih chî-ah kan ngai lo," a ti.

Congress leh MNF party-te'n MDC an neih zat belh khawm chu 14 a ni a, sorkarna an siam dun theih thu sawiin Lallianchhunga chuan, "Mahse, ADC-ah anti-defection law a awm ve loh avangin awlsam taka pheh thlûk theih reng a ni dawn. Congress hian thuneihna chan ngawr ngawr hi a tum a ni lo a, sorkar ṭha siam hi kan tum ber a ni," a ti a; sorkar ṭha lo leh nghet lo tak siam ai chuan opposition-a awm rih a ṭha zawkah an ngai tih a sawi.

Dr Lallianchhunga chuan, BJP leh MNF chu central lamah BJP kaihhruai NDA leh NEDA hnuaia thawkho sa an nih thu sawiin, "Sam inphiar zawm sa reng an nih avangin MADC-ah pawh hian awlsam takin an thawkho mai turah kan ngai a, an tan thawh dun theih lohna tur a awm kan hre lo. MADC-ah hian sorkar nghet tak leh sorkar ṭha tak ding se kan duh tak zet," a ti.

Congress-in MDC pali chauh an neih thu sawiin Dr Lallianchhunga chuan, "Mara mipuite'n opposition-a ṭhu rih turin min duhah kan ngai," a ti a, mipui tam zawk duh thlanna chu zahawm an tih thu a sawi.

MPCC Media Chairman chuan, Congress party MDC palite an chhuan thu sawiin, "Party thuneitu sangte thutlukna zahthiam a, retheih pawh huama a ṭha zawk beiseia an inhlanna hi a ropui kan ti. Duh duha nam thlûk theih leh kawih her theih sorkar siam duh lo a, anmahni mimal hamṭhatna tur thlêmna nasa tak tlànsana Mara ram tana an inhlanna hi ADC inthlanah chuan thil entawn tlak leh chhinchhiah tlak berte zinga mi a ni," a ti.