Dan loa gas leh oil zuarte'n thupek an zâwm ṭhaah ngai
Food, Civil Supplies & Consumer Affairs (FCSCA) department hotute chuan, eirawngbawlna gas (LPG) leh tuialhthei (POL) hmanga dan kalha sumdawnna (black marketing)-ah Aizawl khawpuia tuialhthei dan lo (black)-a zuarte'n thupek an zawm ṭha tlangpui niin an sawi a; dan bawhchhia mi pakhat chiah an la man a ni.
FCSCA department hotute chuan Vanglaini palai zawhna chhangin, dan loa LPG leh POL zawrhnate an fan kual ṭhin thu an sawi a, "Aizawl khawpuia petrol a black-a zuarte kan vâi a, kan hmuhte chu ti tawh lo turin warning kan pe," an ti a; warning an pek hnuah Aizawla MIZOFED petrol pump bula mi pakhatin a la zawrh luih avangin an man thu an sawi.
Oil leh gas black market tihbo chungchangah hmasawnna an hmu nia sawiin FCSCA hotute chuan, "A tira zuar ho, warning kan pekte khan an nei tawh lo a, a remchan dan angin black market tihna hmunte fan kual zel kan tum," an ti.
April 13, 2022 khan FCSCA Director chuan dan kalha eirawngbawlna gas leh tuialhthei hmanga sumdawnna hmunte dap chhuah leh man theihna thupek a tichhuak a; dan lo leh dik lo taka sumdawnna chungchanga thupek chu Mizoram sorkar dan ding lai a nih thu a tarlang a ni.
Hetih lai hian, MIZOFED pump bulah chuan niminah pawh petrol zuar hmuh tur an la awm a; Aizawl khawpui chhung leh pâwn hmun hrang hrangah dan loa zawrh petrol lei tur a la awm reng tho nia thu dawn a ni.