KHAWTHLIR
Thisen pe
KṬP, Jubili Branch, Mission Vengthlang chuan May 14, Inrinni khan an kohhran hall-ah thisen pek an huaihawt a, Synod Hospital tan thisen unit 26 an pe a, petute mipa 23 leh hmeichhia pathum an ni.
Covid-19 vanga thite râlna sum
Aizawl bawrhsap Dr Lalhriatzuali Ralte chuan hriattirna chhuahin, March 20, 2022 hma lama Covid-19 vanga thite tana zangnadawmna (ex-gracia) dilna chu May 20, 2022 ral hma ngeiin Aizawl DC pisaa thehluh tur a nih thu a tarlang. March 20, 2022 hnu lama Covid-19 vanga thite chu an thih ní aṭanga ni 90 ral hmain dil tur a nih thu leh, hun tiam ral hmaa dilna thehlut lote chu hnâwl an nih tur thu a tarlang bawk.
AR-in buatsaih
Assam Rifles chuan nimin khan Hnahlan leh Kàwlbêm khuaah hmeichhiate pualin thiamthil zirna, 'A lecture on skill development programme for women' an buatsaih a, mi 26 an tel. He hun hi hmeichhiate'n hmasawnna tluantling zawk an neih theihna tura buatsaih a ni.
Minister-in hmanpui
Mizo Students' Union chuan May 13, 2022 zan khan Thingsai community hall-ah Federal Meeting an nei a, Higher & Technical Education (HTE) minister Dr R Lalthangliana'n a hmanpui. Minister chuan all India service lamah ṭan la turin zirlaite a sáwm a, "Tih tak zeta zirlaite'n hma kan lak chuan India ramah nasa takin kan inpho chhuak thei ang. Vai tih theih chu kan ti ve thei, all India service lamah nasa takin ṭan la thar ang u," a ti.
Vawk pe
Mizoram Youth Commission leh AH&Vety department-te'n Lawngtlai district-a training an buatsaiha inzir zo mi 20 hnenah tun hnai khan vawk pahnih ṭheuh pek a ni. Vawk dawngtute hi state danga hnathawk, Covid-19 avanga an eizawnna chána Mizorama rawn hawte an ni a, a hmain vawk-in sakna tur Rs 6,000 ṭheuh pek an ni tawh bawk.