Covid avanga hma kan lâk theih lohte Hma kan la thei tawh ang - Dr Thangtea

MNF adviser Dr R Lalthangliana, minister ni bawk chuan, "Term lehah kan CM Pu Zoramthanga kaihhruai MNF hi Pathian leh mipui zarah kan sorkar leh ngei ang a, Covid avanga hma kan lâk theih lohte hi chak takin hma kan la thei tawh ang," a ti.

He thu hi Dr R Lalthangliana hian a bial, South Tuipui constituency chhung khaw hrang hrang - New Ngharchhip, Ngharchhip, South Chawngtui, Khawhri, Aithur leh Tarpho khuate May 14, Inrinnia a tlawhnaa a sawi a ni.

Dr R Lalthangliana chuan, a bial chhunga kawng siam mek chawlhsan rih a ni chu a ngaimawh thu sawiin, "Kan hun hmaa sorkar hmasate'n an lo inpek tawh kha a ni a, contractor pawh ka la hmu lo a, telephone erawh chuan ka be tawh," a ti a; department leh contractor-teah hmalak a tum thu sawiin, "Kumin August thla chhung chuan an zo hman tawh turah kan beisei. Hmun ṭhenkhatah contractor-te'n hna an hralh ṭhin a, hna a ṭhat loh phah a, hna a muang bawk a, hetiang hi kan duh loh záwng tak a ni," a ti.

Myanmar politics boruak avangin Myanmar nena ramria insumdawn tawnnaah hma an la hlei thei lo tih sawiin R Lalthangliana chuan, "Bangladesh lam nen erawh tluang takin kan indawr mek zel a, a taka kan insumdawn tawn theih hunah chuan heng lai vela chengte hi a zár zo hmasa tur in ni," a ti a; balu leh thlai tharte hlâwk zawka an hralh theih dawn thu a sawi.

Dr R Lalthangliana hian a bial chhung khaw ṭhenkhata Myanmar ram buai aṭanga Zo hnahthlak rawn lutte a tlawh nghal a, ṭanpuina pawisa a pe a ni.