LMC inthlan hmachhawn turin ZPM party an inbuatsaih ṭan

ZPM PAC member leh Lunglei Municipal Council (LMC) Election Committee chairman TBC Lalvenchhunga chuan, Mizoram sorkar mumal lo avangin LMC inthlan tur ruahmanna felfai la awm rih lo mah se, ZPM party chu inthlan hmachhawn turin theihtawpa an inbuatsaih thu a sawi.

TBC Lalvenchhunga hian May 12, Inrinni khan Lunglei Press CLub-ah thuthar thehdarhtute a kâwm a; kumin chhung ngeiin LMC inthlan buatsaih tum a nih thu UDPA changtu Deputy CM-in a sawi nawn avangin ZPM chu theihtawpin an inbuatsaih nghal tih sawiin, "Ward delimitation tihfel a la ni lo a, electoral roll ruahmanna felfai la awm lo, thuneihna a ken chin tur emaw ruangám, executive body pawh la peih loh, budget-ah nuai 80 chauh dah ni mah se, kan party chu inthlan hmachhawn thei turin theihtawpin kan inbuatsaih a ni," a ti.

LMC inthlanah candidate ṭha, mipui tana thlan châkawm leh duhawm tak tak nei tura ZPM Southern Hqrs hruaitute hmalakna a fakawm tih sawiin Lalvenchhunga chuan, "Lunglei khawpui hmasawnna atana hmathlirte huam kim zawk a nih theih nan mithiam te, pawl hruaitu leh kawng hrang hranga eizawngte nen thuràwn la khawma dawngsawng tûrin ruahmanna siam a ni," a ti a; roadmap fel tak siamin mawhphurtu tur an inruat tawh thu a sawi.

TBC Lalvenchhunga chuan, LMC din turah Mizoram sorkarin felfai taka mawhphurhna leh thuneihna a pek chin tur te, sum hnár tarlan turte sawi fak theih a la awm lo a, executive body mumal din a la ni lote chuan sorkar mumal lohzia a tichiang tih sawiin, "Heti chung hian mipui min barh thut hi MNF sorkar kalphung a nih avangin, mamawhna leh mamawh danah inràwnna mumal awm loa LMC inthlan buaipui em em sorkar hi thlâk turin ZPM chu kum 2023-a rorelna khawl chelh turin a inpeih reng a ni," a ti.