Kumin May thla chanve chhungin Covid-19 vangin mi pakhat chiah a thi

Mizoramah Covid-19 vei May 13, Zirtawpni khan mi 63 leh May 14, Inrinni khan mi 30 hmuh chhuah a ni a, positivity rate a sang chhoh leh mek. Inrinni leh nimin khan hripui vei dam tawh mi 28 chhuahtir an ni a; hripui vei zingah thi an awm lo. Tun May thla chanve chhungin Covid-19 vanga thi mi pakhat chiah a awm.

Covid-19 vei May 13-a hmuh chhuah mi 63-te chu mipa 26 leh hmeichhia 37 an ni a; RT-PCR hmanga hmuh pathum leh RAT hmanga hmuh 60 niin, positivity rate 18.58% a ni. Mi 63 zinga a zatve aia tam chu Saitual district-a mi an ni a, mi 19 chu Lènchím khuaa mite an ni.

May 14, Inrinnia hripui vei hmuh thar mi 30-te chu district palia mite niin, mipa 13 leh hmeichhia 17 an ni a; RAT hmanga hmuh chhuah vek niin, positivity rate 19.23% a tling. Mi 30 zingah district khawpuia mi pali chiah telin, a bak zawng, mi 26 chu district khawpui pawn lama mi an ni a; hmuh tamna ber Sialsuk khuaah mi pakua hmuh a ni.

Nimin tlai dar 5 thlenga dinhmun angin, ni 13 chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni a, tun May thlaah thla chanve chhungin hripui vangin mi pakhat chiah a thi a ni.

IDSP record angin, Mizoramah Covid-19 vei 2,27,992 hmuh chhuah a ni tawh a, mipa 1,06,156 leh hmeichhia 1,21,836 an ni a, mipa aiin hmeichhia 15,680-in an tam zawk. Nimin tlai dar 5 thleng khan mi 2,27,033 (99.58%) chhuahtir an ni tawh a, mi 697 (0.31%) thi tawhin, enkawl mek mi 262 (0.11%) an awm.

Nimin tlai khan Saitual district-ah hripui vei enkawl lai 114 awmin, Mizorama district 11 zingah a tamna ber district a ni a; Kolasib, Lawngtlai leh Hnahthial district-ah hripui vei an awm rih lo thung.