BSF lakah FIR thehluh a ni tawh

Lunglei SP Stephen Lalrinawma chuan, Border Security Force (BSF) sipai, Covid-19 veite fimkhur lo taka civil mite zinga an kal avang leh mipui zinga hripui tidarh thei zawnga an awm avangin an lakah FIR thehluh a awm thu a sawi.

July 9, Ningania Lunglei bawrhsap V Lalsangliana hoa District Task Force leh village task force hrang hrang hruaitute ṭhutkhawmnaah Lunglei SP chuan, BSF sipaite laka FIR thehluh a awm thu hi a sawi a; inràwnkhawmna hi Lunglei DC Conference Hall-ah neih a ni.

Lunglei SP chuan, The Mizoram Containment and Prevention of Covid-19 Ordinance, 2020 behchhana an chunga action la turin police lamin hmalak ngei an tum thu sawiin, "Tun dinhmunah Covid Care Centre-a enkawl mek an nih avangin hemi chungchangah hian hmalak zung zung theih a la ni rih lo," a ti. 

Stephen Lalrinawm­a chuan, dan leh thupek kenkawh kawngah police-te'n theihtawp an chhuah mek thu sawiin, mipuite chu chîâi lo tur leh sorkar thupekte zâwm ṭha turin a chah a ni. Inràwnkhawmnaah hian Lunglei DTF chairman V Lalsangliana chuan, Lunglei district-ah Covid-19 vei mi 47 enkawl dam an nih tawh thu sawiin, Covid-19 do kawnga Lunglei district mipui ṭanhona leh thawhrimna rah a nih thu a sawi a; tuna an district-a Covid-19 vei mek­te chu BSF sipai vek an nih thu leh, chu'ng mite chu Covid Care Centre (CCC) - SIRD, Pukpuiah enkawl an nih thu a sawi bawk.

Lunglei DC sawi dan­in, BSF mi leh sa Co­vid-19 veite chung­changah hian Lunglei SDO (Sadar) M Misael chuan July 6, 2020 khan BSF battalion pathum - 60, 61 leh 131 hotute a kâwm tawh a; qua­rantine an kalpui dan te, state páwn aṭanga Mizorama sipai lo lut tur an la neih dan te, BSF zingah Covid-19 awareness neih a ṭul dante sawipuiin, an hmalaknate leh din­hmunte Lunglei DC hnen­a chipchiar taka hriat­tir ṭhin turin a chah a ni.