SSA-a thawkte hlawh tur kan nei - Rohluna ; Hindi zirtirtute dinhmun tur a la chiang lo

School Education minister H Rohluna chuan, kumin sorkar kum chhunga SSA-a thawkte hlawh tur sorkarin a neih tawh thu a sawi. Hetih lai hian, CSS hnuaia Hindi zirtirtute dinhmun tur chu a la chiang lo.

SSA-a thawkte hlawh leh CSS Hindi zirtirtute chungchang buaipuia New Delhi-a zin School Education Minister hian nimin khan Lengpui Airport-ah thuthar thehdarhtute a kâwm a; Ministry of Human Resource Development (MHRD) minister Prakash Jevadekar leh MHRD hotu dangte an biak hnuah Mizoram SSA sum tur cheng nuai 7228 sanction letter nen Mizorama an rawn lêt thu a sawi.

H Rohluna chuan, SSA atana India ram pumin sum a mamawh zat sorkar laipuiin budget-ah a dah lo tih sawiin, "Budget-a sum dahin a daih loh avang hian SSA-a thawkte'n hlawh an lak ngei theihna atan sorkar laipui dawr vat ṭulin kan hria a, tun hma aṭangin kan lo nawr tawh ṭhin. Tunah hian second instalment sanction order kan rawn hawn thei a, kan lawm hle," a ti.

Minister sawi danin, sorkar laipuiin SSA atana sum a sanction thar hi hlawh tur chauh a ni lo a, thil ṭul dangah pawh hman a ni dawn. Sorkar chuan hlawh tur a ngai pawimawh ber dawn a, tuna sorkar laipuiin sum a sanction hi hlawh atan ni lo hman ṭhen ni dawn mah se, sorkar kum kal mek atana SSA-a thawkte hlawh tur a daih tawh.

Mizoram sorkar chuan thil tih fel ṭul hrang hrangte a tihfel hnuah SSA-a thawkte hnenah hlawh a pe nghal dawn a, sorkarin hlawh a la bat August 2016 aṭanga January 2017 hlawh chu a hlâwma pek nghal a ni ang. A bak chu thla khat hlawh zela pek chhunzawm tawh tur a ni.

SSA-a thawkte'n hlawh an lak theih nan protocol pawh ngai pawimawh loin a ṭul ṭul an dâwr tih sawiin Rohluna chuan, "Ram leh hnam tan chuan protocol pawh kan ngaihtuah lo. Chhungkaw tam takin hlawh an lak theihna tur a nih chuan a ṭul ang ang kan bawhzui rawk rawk mai a ni," a ti a; an hlawh tur an nawr chhuah theih avangin SSA-a thawkte an lawmpui thu a sawi.

Zawhna chhangin H Rohluna chuan, tun hnaia SSA-a thawkte hlawh chungchanga sawi neuh neuh a awm vanga MHRD dawr an nih loh thu a sawi a, "Tun hma pawhin kan nawr reng reng a, tunah pawh ṭula kan hriat avangin kan kal a ni," a ti.

Minister Rohluna chuan, CSS hnuaia Hindi zirtirtute chungchang pawh MHRD hotute hnenah an thlen tih sawiin, "Hindi zirtirtute hian hlawh an lak ngei theihna atan leh chhawr chhunzawm zel an nih theihna atan Ministry hotute kan dawr a ni," a ti a; Hindi zirtirtute contract chu February 2017 thla tawpa tawp tur an nih thu a sawi.

Hindi zirtirtute hlawh tur a chhuahna atan thla khat vel a la ngaia a rin thu sawiin Rohluna chuan, "Chhawr chhunzawm zel an nih dawn leh dawn loh chu Ministry lamin an ngaihtuah mek a, an dinhmun tur a la chiang lo," a ti.

School Education Minister chuan, sorkar laipuiin Hindi zirtirtute rawih chhunzawm dawn lo se, Mizoram sorkarin a a rawih chhunzawm dawn leh dawn loh chungchang zawhna chu, sorkarin a la ngaihtuah loh thuin a chhang.

H Rohluna ṭawiawmtu parliamentary secretary (School Education) Joseph Lalhimpuia chuan, SSA-a thawkte hlawh tur an nawr chhuak chuan SSA-a thawkte hlawh tur awm ang ang pek zawh tawh a ni tih an sawi ṭhin chu thu dik a ni tih a nemnghet niin a sawi a, "Ṭul loah mipui an buai a, pawi kan ti hle a ni," a ti.