Kâng ṭhelhna tur fire hydrant hawng ; YMA branch-te hnenah hlan a ni

Aizawl khawpuia kâng ṭhelhnaa hman tur, tui chawina tur fire hydrant leh tui lakna tur pipe (hose) pipe, Public Health Engineering (PHE) department ruahman chu nimin khan Home minister R Lalzirliana'n Vanapa Hall-ah a hawng a; Aizawla YMA branch 81 hnenah hmanruate chu a hlan nghal.

Fire hydrant leh hose pipe hawnna leh hlanna inkhawm hi PHE enkawltu minister Zodintluanga leh parliamentary secretary Hmingdailova Khiangte-te pawhin an hmanpui.

Kangṭhelh motorin tui a chawina tur fire hydrant hi milimetre 40-a lian a ni a, Aizawla hmun 400-ah bun tur niin, tun dinhmunah hmun 65-ah bun tawh a ni. Kâng ṭhelhnaa tui lakna tur hose pipe chu metre 15-a sei, metre 75 thlenga zawm sei theih a ni a, tel nga ṭheuh YMA branch-te hnenah pek a ni.

R Lalzirliana chuan, Mizoramin hmasawnna méllung thar a phun belh tih sawiin, thil ṭha neih vanga lawm nachang hriat a pawimawh thu a sawi a; PHE hmalakna chu mipui vantlang tana rotling a nih avangin a enkawl leh venhim kawngah a awmna veng mipuite'n an mawhah la se a duh thu a sawi.

Home Minister chuan, "Phunchiar si, a ṭha lai erawh zêp tlat kan ni ang tih a hlauhawm. Kan inenfiah a hun tak zet a, sorkar hmalakna ṭha tak takte hi kan chawimawi hreh a nih pawhin kan roh tal a, a venhim hna pawh kan mawhphurhna a ni tel tih kan hriat a ngai," a ti a; YMA leh tlawmngai pawl dangte thlàwpna vangin sorkar hmalakna tam tak a hlawhtlin ṭhin thu a sawi a ni.

R Lalzirliana chuan, Khatlaah fire station hawn thuai a nih theih nan chak taka hmalak a nih thu a sawi a; tuizém leh ṭul dangte siam belhna tur sorkar laipui aṭanga cheng nuai 1000 hmuh thuai beisei a nih thu a sawi bawk.

PHE minister Zodin­tluanga chuan, Mizoram­ah ṭhál laiin kângmei a chhuak tam ṭhin tih sawiin, tuna PHE department hmalakna chuan Aizawl khawpui chhung bikah kângmei vanga chhiatna a tihziaawm deuh a beisei thu a sawi a; chutih rualin, kângmei a chhuah loh nan mi tinte fimkhur turin a chah.

Zodintluanga chuan, tuna hmalakna chu a bul ṭanna a nih avangin duhthusamin fire hydrant-te chu hman theih loh palh a awm thei tih sawiin, "Thuam ṭhata tihchang­tlun zel a ni ang. Siam ṭhat ngai leh rawtna ṭha zawkte dawng turin sor­kar a inhawng reng a ni," a ti a; district khawpui leh hmun dangah pawh hmalak zel tum a nih thu a sawi.

PHE Minister chuan, fire hydrant hawn a nih hmain an vuah tawha pipe vuahna 50 aia tam rûkbo hman a nih thu a sawi a; mipuite chu kâng ṭhelhna hmanraw pawimawhzia hria a, a venhim hna thawhpui turin a sáwm.

Kâng ṭhelhna hmanrua inhlannaah hian Fire & Emergency Services director Neihchungnunga leh Central YMA president Lalbiakzuala te pawhin thu an sawi a; fireman-te'n fire hydrant-a kâng ṭhelhna tui pipe vuah dan an entir a ni.