Moral reformation kan mamawh - CM

Social Welfare department enkawl, Hunthar Venga Protective Home Complex-a in sak tharte chu nimin khan chief minister Lal Thanhawla'n a hawng. CM chuan, Mizoramin chhungril nun (moral) leh khawtlang nun (social) siamṭhat a mamawh thu a sawi.

Chief Minister chuan, chhan hrang hrang vanga vanduaina tâwk leh humsual dái hmeichhiate enkawlna leh nun kawng dik an zawha eizawnna kawng an neih theihna hmun Protective Home tihchangtlun a ni chu lawmawm a tih thu a sawi a, "He hmuna thawktute kaihhruainain home-a awmte'n nun kawng pangngai an zawh ngei kan duhsak a ni," a ti.

Mizoram tan moral reform leh social reform a pawimawh thu sawiin Lal Thanhawla chuan, "He thil hi kohhran leh tlawmngai pawlte kutah chauh dah a tâwk lo a, political party ang pawhin hmalak dan ngaihtuah a pawimawh a ni," a ti.

In hawnna inkhawm hi Social Welfare minister PC Lalthanliana'n a kaihruai a, Social Welfare director Vanlaldini'n Protective Home chungchang leh an hmalaknate a sawifiah.

Chief Minister-in a hawn tâk in tharte hi administrative building, common facility centre, protective home (hostel), nurse leh superintendent quarters-te a ni a, North Eastern Council aṭanga hmuh sum cheng nuai 275.72 hmanga sak a ni.

Protective Home hi Immoral Traffic Prevention Act, 1956 Section 21 hmanga din a nih angin, mipat hmeichhiatna lam hawia humsual daite tan buatsaih a ni. July 9, 2015 aṭangin Mizoram sorkar chuan Protective Home hi ruih theih thila harsatna tâwk leh ruihhlo ngai hmeichhiate tan inenkawlna hmunah a puang.