Chin Lushai Conference hman mek a ni ; Inpumkhat nan sorkarin ṭan a la - CM Hawla

Zo Reunification Organization (ZoRO) chuan, Thawhlehni zan aṭang khan Kolasib Diakkawn YMA conference hall-ah 'Chin Lushai Conference' an buatsaih a, nimin khan chief minister Lal Thanhawla'n a hmanpui.

Chief Minister chuan, Zo hnahthlak hnam hrang hrangte insuihkhawmna leh inpumkhatna atan sor­karin theihtawp chhuah­a hma a lak thu sawiin, "Tunah rih chuan sorkar pathum hnuaiah awm mah ila, thisen zawm kan nihna leh chhulkhatkual kan nihna hi a bo dawn lo. Pathian­in rem a tih hunah rorelna pakhat hnuaia kan awm ngei ka beiseiin ka ring a, mahse, he hun hi beiseina nung nen kan nghah a ngai," a ti.

Nationalism chungchang sawiin Lal Thanhawla chuan, "Nationalism hi hmui leh ṭawngkamah mai ni loin, kan thinglung leh kan rilruahte a awm a ngai a, takna leh dikna a mamawh. Hetiang ngaihtuahna nen inpumkhatna kan vei a nih chuan tun aiin Zo hnahthlakte inpumkhatna leh inunauna hi a chak leh zual ka beisei," a ti a; Zo hnahthlakte chu an awmna ṭheuha khua leh tui ṭha leh rinawm ni turin a chah.

Chief Minister chuan, inpumkhatna leh insuihkhawmna atana hmalakna leh ke pênnaah fimkhur a ngaih thu sawiin, "Kan thil duh panna kalkawng hi a harsa a, kih hnawk awm loa hma lak kan thiam a ṭul. Hnung lama mit neite kan ven a ngai a, mahse, rilru khata kan awm a, kan inpumkhatna tichak zawnga ke kan pên zel chuan kan tum ram hi kan thlen ka beisei. Kan tumah kan chian chuan tuma'n min dal thei lo," a ti.

MNF president Zoramthanga pawhin thu sawiin, Mizo hnahthlak zawng zawng inzawmkhawmna atan ZORO-in hma an lakna chu MNF party din tirh aṭanga an policy pui ber pakhat a nih ṭhin thu a sawi a, "Mizo hnahthlakte inzawmkhawmna atan kan vaiin mawh kan phur a ni," a ti.

Zo hnahthlak zawng zawng inzawmkhawm chu kum 1966-a rambuai ṭan hma pawhin MNF-in an tlangaupui tawh ṭhin thu sawiin, Zorama chuan, "Ram a lo buai hnu pawhin MNF party leh hnam sipaite'n Burma, Manipur leh hmun hrang hrangah nunna hlânin an lo bei tawh ṭhin," a ti a; India sorkar nena inbiak laiin India ram huam chhunga Mizo hnahthlak zawng zawngte chu rorelna khat hnuaia awm turin nasa takin India sorkar an nawr ṭhin niin a sawi.

Central YMA president Lal-biakzuala pawhin thu sawiin, inpumkhatna leh insuihkhawmna chu YMA ngaih pawimawh ber a nih avangin YMA-in hma a lak zel tur thu a sawi.

Chin Lushai Conference hian ni thum a awh dawn a, political party hrang hrang president leh VIP-te'n an hmanpui ṭhin dawn a ni.