Ṭhuampui mipuiin AMC pisa an dang

Ṭhuampui khawtlang mipuite chu AMC Commi­ssioner laka an lungawi loh avangin, nimin tlai khan an venga Aizawl Municipal Corporation (AMC) pisa kawtah pung­khawmin, AMC-a thawkte pisa báng tur an dang a; he thu ziah lai thleng hian an la indang.

Thu dawn danin, Ṭhuam­pui mipuite hi chaw­hnu dar 3 velah an pung­khawm ṭan a, police eng emaw zat an duty. An lung­awina leh duh ang an la hmuh loh avangin he thu ziah lai thleng hian AMC-a thawkte chu an la dang a ni.

Ṭhuampui YMA hruaitute zinga mi K Lalrimawia'n Vanglaini palai a hrilh danin, January 30, Thawhṭanni khan AMC-a thawkte'n AMC pisa kawt, NH-54 kawngpui kama Ṭhuampui YMA-in thing an phun, thira an hung chu an kit. Hei vang hian AMC hotute'n Ṭhuampui YMA-ah thupha an chawi an beisei a, mahse nimin chawhma lam thlenga thupha an chawi loh avangin nimin khan AMC pisaah lamkal mi paruk intirin, an kih chhan zawh an tum a ni.

YMA lamkalte AMC commissioner Dr H Lalthlangliana'n a lo chhan danah an lawm lo hle tih sawiin, K Lalrimawia chuan, "Aizawl enkawltu an ni a, an thuneihna a nih thu te, a duh chuan a mantir theih thutein a lo chhang a. 'Ka rawn kal lo ang, kan naute pawh an rawn kal lo ang' a lo tih khum a. YMA min zah lo lutuk a, kan thinrim a ni," a ti.

Ṭhuampui mipui an punkhawm hnu, nimin tlai khan AMC councillor pahnihte'n Ṭhuampui YMA hnenah thupha an cháwi tih sawiin, K Lalrimawia chuan, "Kan kal zel dan tur chu meeting-ah kan ngaihtuah ang," a ti a; thing phun kih a nih zanah AMC Deputy Mayor-in YMA hruaitu pakhat a bia a, thupha a chawi thu a sawi bawk.

AMC-in Ṭhuampui YMA thing phun an kih chungchang hi AMC commissioner Dr H Lalthlang­liana chuan a sawifiah a; YMA thing phun chu AMC-a thawktute kih ni loin, Aizawl khawpui chei tura rawih mi dangin an kih niin a tarlang. YMA thing phun kih a ni tih an hriat veleh a kittu Bonsai Association of Mizoram-te insawifiah tura hriattir an nia sawiin, "An insawifiahna ngaihthlak a ni tawh a, an tih ngei a nih thu an pawm," a ti.

AMC Commissioner chuan, AMC pisaa Ṭhuampui YMA lamkalte hnenah cheng nuai khat thleng chawitir leh lung ina tàntir thei anga a lo sawi khum anga sawi chungchangah, "Thing kittute hrem theih an nih thu hrilhfiahna hriat sual palh mai a ni zawk. High Court phei chu lam rik a ni lo hrim hrim," a ti a; thing phun venghim tura Ṭhuampui YMA member-te an kal khawm thei chu lawmawm a tih thu leh Ṭhuampui vengah thing tam zawk phun belh tum a nih thu a tarlang.

Dr H Lalthlangliana chuan, thing kittute chu hremna pek an nih tur thu a tarlang a, "Thu inhriat sual palh vanga YMA member-te rilru ná hi pawi kan ti a, ngaihdam kan dil a. hetiang hi a thlen tawh loh nan dawhkân khata ṭha taka sawihopuiah YMA hruai­tute ka sáwm a ni," a ti.