Lei khî vangin Bible House thiat dawn ; LAD leh LEIT building thiah tura tih a ni

Aizawl District Disaster Management Authority (ADDMA) chuan, MG Road-a lei khî vangin Bible House leh a thlanga sorkar quarters pakhat chu ṭhiah turin a ti. Sorkar in dang, LAD Directorate leh Labour, Employment & Industrial Training (LEIT) Directorate building-te ṭhiat turin a ti bawk.

ADDMA-a chief executive officer (CEO) Lalhmunsanga Hnamte-in zawhna chhanga a sawi danin, Bible House bula MG Road-a lei khi chu UDPA minister Zodintluanga, ADDMA hotute leh Disaster Management & Rehabilitation (DMR) department mithiamte'n ṭum hnih an enfiah hnuah, Hazard Safety Cell-in an enfiah leh a, Hazard Safety Cell rawtna angin Bible House leh a thlanga sorkar quarters, GAD enkawl chu ṭhiah tura tih a ni.

ADDMA CEO chuan, Hazard Safety Cell-ah hian chairman chu PWD Chief Engineer (Buildings) a ni tih sawiin, "Hazard Safety Cell thurâwn angin, retaining wall siam vat tur leh tui lut thei loa tui luanna (drain) ṭha tak siam tura tih a ni a; mahse, heng zawng zawng hi ti mah ila, fûrah chuan rin ngam a ni chuang lo a, ṭhiah mai an rawt a ni," a ti.

Bible House leh a thlanga sorkar quarters ṭhiahna tur thupek chu ADDMA chuan January 27, 2017 tlai khan tichhuakin, PWD leh GAD-te chu a rang lama hma la nghal tura tih an ni a; sorkar quarters chu hma lak nghal mai theih a nih laiin, Bible House erawh chu a neitu Bible Society of India (BSI) hotute nen la inràwn leh phawt a ngai.

Bible House ṭhiah tura rawt a nih chungchangah BSI Aizawl Auxiliary hotute chuan BSI hmunpui, Bengaluru-a BSI hotute thu nghak lawk turin ADDMA an ngen tih sawiin, Lalhmun­sanga Hnamte chuan, "A ṭhiah leh sak leh dan turah engtia tih tur nge tih la ngaihtuah a ngai. A ṭhiah man ringawt pawh tu tum tur nge tih a la hriat loh. Danah chuan mipui tana him lo a nih chuan zangnadawmna phût theih a ni lo a; mahse, Bible House lam thiam lohna a awm lo a, la sawiho zel a, hotute thu anga tih a ni ang," a ti.

ADDMA CEO chuan, Thakthing Venga Local Administration Department (LAD) directorate building leh Upper Republic Venga LEIT directorate building-te chu him loa ngaih a nih avangin ṭhiahna tur thupek pawh tihchhuah a nih tawh thu leh office an insawn fel veleh ṭhiah nghal tum a nih thu a sawi.

Lalhmunsanga Ralte sawi dan­in, LAD leh LEIT directorate-te hi Hazard Safety Cell-te'n an enfiah tawh a, an rawtna angin ṭhiah tura tih a ni. LAD directorate building phei chu a khi nasa tawh hle a; LAD office chu an insawn tawh a, ṭhiah thuai beisei a ni.

Tuikual chung, Dawrpui West-a Darchhinga building chhawng 11, a him loa ngaih vanga ṭhiat tura tih tawh chung­changa zawhna chhangin, Lal­hmunsanga chuan, ADDMA thupek angin ina khawsate chu an insawn chhuak vek tawh tih a sawi a, "PWD-te hma la ṭan turin kan ti a, PWD-in engtin nge hma an lak zui kan hre chiah rih lo," a ti.

ADDMA CEO sawi danin, Darchhinga ina khawsa chhungkuate chu an insawn chhuah vek hnuah a neituin a ṭhenkhat lai chu a tichhe nual tawh a ni.