Mipuiin N. Vanlaiphai SDO an dang

North Vanlaiphai SDO V Laldinsanga, sorkarin a sawn vanga North Vanlaiphai aṭanga an chhuak tur chu nimin khan North Vanlaiphai khawtlangin an dang.

Thu dawn danin, V Laldinsanga hi sorkarin Lawngtlai SDO(Sadar) ni turin a sawn a, transfer order chu October 13, 2016-ah tihchhuah a ni.

Hun eng emaw chen N.Vanlaiphaia a la awm zui hnuah Lawngtlai SDO ni tura a chhuah a hun tawh a; khawtlangin chhuah an phal loh avangin N. Vanlaiphai NGO Coordination Committee chuan an dang ta a; Coordination Committee-ah hian YMA, MUP, MHIP, MZP leh MSU-te an tel.

NGO Coordination Committee chuan, V Laldinsanga chu a bial chhung tan hna a thawk ṭha hle tih sawiin, "A sorkar hnaa a mawhphurhna bak pawh bial chhung hmasawnna tur atan a thawh hlâwk em em a, N. Vanlaiphai hian kan la mamawh a, bial mipuite'n kan la ui a ni," an ti.

NGO Coordination Committee hruaitute sawi danin, V Laldinsanga hi N. Vanlaiphai aṭanga sawn chhuak lo turin Mizoram sorkarah an ngen tawh ṭhin a; N. Vanlaiphai SDO(C) a nih zel theih ngang loh pawhin, a chhuah hma ngeia hna dang nena kawp ni lo SDO(C) hna chelh tur pe turin sorkar an ngen a ni. V Laldinsanga thlaktu tur hi sorkarin a la dah lo niin an sawi.