KHAWTHLIR
Nungcha humhalh
Phulpui V/C chuan, Phulpui ram chhungah khaw dang miin silai hmangin sava leh ramsate an veh ṭhin tih tarlangin, mi ṭhenkhat phei chuan ni khatah sava 100 chuangte an kâp thla ṭhin nia an hriat thu an tarlang. Phulpui ram chhunga sava leh nungcha dangte chu an humhalh tih sawiin, pêl tawh lo turin mi tin an ngen a; an ngenna leh thupek zâwm lo an awma man an nih chuan, an chungah action lak a nih tur thu a puang.
CM Relief Fund
Class I Contractors Association president Hrangkunga chuan, Chief Minister's Relief Fund-ah Rs. 1,00,000 a chhûng lût. Relief Fund hi mi harsate ṭanpuina atan hman ṭhin a ni.
Kal phal lo
Mamit DC chuan thupek chhuahin, West Phaileng leh Marpara inkar kawng chu a zim avang leh kawng chhuat a bal avangin lirthei lian chi leh sei chi (long body multi-axle) leh metric ton 15 (motor rihna nen) aia rit phur reng reng kal phal a ni loh thu a tarlang.
Inthlan thlir lâwk
Mara Autonomous District Council (MADC) inthlanpui awm tur thlir lâwkin, nimin khan Siaha District Level Standing Committee chu DC Harleen Kaur hoin DC conference hall-ah an ṭhukhawm a, offcial-te bakah political party leh NGO aiawhte an tel.
ODF lawm dawn
Inthiarna mumal nei lo awm lohna, Open Defecation Free (ODF) atana Mizorama district puan hmasak ber Champhai chuan ODF atana puan an nih lawm an tum a, a lawm dan tur ngaihtuahin Thawhlehni khan DC Vanlalngaihsaka hoin DC conference hall-ah meeting neih a ni. Meeting-a rel a nih dan chuan ODF hi February 17 ah lawm a ni dawn a, chief minister Lal Thanhawla khuallian turin an beisei.