Siahatlaa chêng mi 17-te'n Covid-19 hripui an vei lo vek
Siahaa Siahatla venga mi pakhat, quarantine centre a chhuahsan hnua Covid-19 vei hmuh chhuahin a kai chhàwn theih tura rinhlelh Siahatla veng mi 17-te swab sample test result chu nimin khan a chhuak a, Covid-19 an kai lo vek tih finfiah a ni.
Tarlan tawh angin, quarantine centre-a awm laia ṭum hnih RT-PCR hmanga swab sample endiknaah a negative ve ve avang leh khung hran hun a zawh tawh avanga mahni in lama inkhung rih tura chhuahtir tawh Siahatlaa mi pakhatin Covid-19 a vei tih hmuh chhuah a ni a; chuvang chuan Siahatla task force chuan an huam chhungah total lockdown an puang a ni.
Siahatla task force hnen aṭanga Vanglaini thu dawn danin, thil thleng avang hian Covid-19 veiin a kai chhàwn theih tura rin mi 17 chu an swab sample endik tura lak a ni a; nimin zing khan result chhuakin, an negative vek a ni. Hetih lai hian, a tìra hriat chhuah loh Covid-19 vei quarantine centre aṭanga hruai chhuah a nih ṭuma kal ve mi pahnih swab sample chu endik turin vawiinah lak a ni ang. Siaha DC Bhupesh Chaudhary chuan, Siahatlaah hian July 7 khan ni 14 chhung atan total lockdown a lo puang tawh bawk.