Krismas & kumthar pualin Central YMA-in ngenna a siam

Central YMA chuan, kumin Krismas leh kumthar 2021 thleng turah Mizo mipuite duhsakna sáng ber an hlàn a; hunpui thleng turah mi dangte harsatna siamtu ni lo a, mite ṭanpuitu ni zawk ṭheuh turin mipui an ngen.

Krismas leh kumthar hunpui thleng turah CYMA chuan mipuite ngenna chi hrang hrang siamin, chu'ngte chu zâwm turin mi tin an ngen a, "Hâlpuah, hâlmawi leh puak thei thilte hi boruak tibawlhhlawhtu a nih rualin, Covid-19 hripui léng mekah harsatna lian zawk thlen thei a nih avangin, mipui kan him tlân nan zuar lo tur leh hmang lo turin kan ngen a ni," an ti.

CYMA chuan, "Sky lantern hian kângmei a chhuah theih avang leh kawlphetha sem darhna nasa taka a tihbuai theih avanga hmang lo turin kan ngen," an ti a; silai lem (a mu kâp chhuak thei) hman hian chhiatna a thlen theih avangin hmang lo turin an ngen bawk.