Kut hnathawktute awhawma siam kan duh - Agriculture Minister

Agriculture minister C Lalrinsanga chuan nimin khan Sialsuk khuaa thlai hriak herna khawl a hawng a, Sumsuih khuaah SEDP hnuaia vaimim chíngtute hnenah hlo kahna khawl a sem bawk. Minister chuan, kut hnathawktute awhawma siam an duh thu a sawi.

Agriculture Minister chuan, Sialsuk tlangdung khaw hrang hranga kut hnathawkte chu ei leh in atana mamawh phuhru tura ṭan la lehzual turin a chah a, "Kan thil tih leh hmalaknaah tih tak zeta tih a ngai. Vaimím hi thar ṭeuh a nih pawhin, a hralhna lamah harsatna a awm dawn lo. Thingtlanga kut hnathawktute hi awhawma siam che u kan duh a ni," a ti.

SEDP hnuaiah agriculture lama hmalakna tura hmachhawp hmasaah sorkar laipuiah cheng vbc. 4,000 chuang ruahmanna thehluh a nih thu sawiin C Lalrinsanga chuan, "Covid-19 vangin sum harsatna kan nei nasa a, kan budget ruahmanna pawh a taka kalpui a harsa a, sorkarin revenue lak luhna mumal kalpui turin a thei rih lo," a ti a, Covid-19 chuan SEDP hnuaia hmachhawpte a tihṭhuanawp thu a sawi.

C Lalrinsanga chuan, Mizo­rama thar chhuahte chu Mizoram sum báwmah lut se an duh thu sawiin, "Kan economy ṭhan chhohna tur hi kan hmalakna lian tur a ni. Ni tin mamawh ei leh inah ram dangah kan pawisa a luang chhuak tam ṭhin hi dan kan duh. Thlai hriak thar chhuak tam turin ṭan lak a ngai a, tél (hriak) kan leina sum ram danga chhuak tam lutuk hi a ngaimawhawm a ni," a ti.

DAO Lalsanglura Sailo sawi danin, Agriculture Minister-in a hawn tâk thlai hriak herna hi Oil Seed Scheme hnuaiah buaipui a ni a, Aizawl district-a circle paliah kalpui niin, Sialsuk Circle chu thlai hriak lama theihna nei ṭha leh leilet puitling sa tamna ber circle a ni. Thlai hriak herna khawl hian quintal khatah litre 30 chuang a her chhuak thei dawn a, thlai ṭiak a ro ṭhat  chuan a aia tam pawh a her chhuak thei dawn niin an sawi.