IPRO-te leh MJA hruaitute inkâwm

Information & Public Relations (IPR) department officer-te chuan nimin khan an director Lallianpuii hoin IPR auditorium-ah kum 2020-2022 chhunga Mizoram Journalists Association (MJA) General Headquarters hruaitu tharte thingpui inpuiin, inkawmhona hun an hmang.

Lallianpuii chuan, MJA Gen.Hqrs office bearer-te leh executive committee member-te chu lawmpuina leh duhsakna a hlan a, "Sorkar leh department hmalakna hrang hrangah MJA-te'n theihtawpin min thláwp ṭhin a, a lawmawm tak zet a ni," a ti.

IPR Director chuan, "Ram chhung leh ram páwna mite'n an hriat theih turin chanchin thar la khawmtu media-te'n thu dik an puanzar chak a ṭul," a ti a; thu thar dik tak puanzar kawngah Mizoram media-te chu tun aia nasa zawka ṭan la turin a duh thu a sawi.

MJA president Zonunsanga Khiangte pawhin thu sawiin, IPR department chu Mizoram media-te tan inpui a nih thu a sawi a; IPR nen thawhhona ṭha tak neih chhunzawm an ngaih pawimawh zel tur thu a sawi bawk.