Skywalk leh ropeway thubuai ACB-in an chhui zo hnai tawh
Sakawrhmuituai tlanga skywalk leh, Chaltlang leh Durtlang inkara ropeway siam chungchanga MNF-te'n thubuai an thehluh chhui tura Lokayukta-in a ruat, Anti Corruption Bureau (ACB) chuan an chhui zo hnai tawh a, an chhuinaah harsatna an tâwk lo.
Vanglaini thu dawn danin, ACB chuan skywalk leh ropeway siam thubuaiah hian a siamtu company JV NEIP chu Delhi-ah ṭum hnih an kalchilh bakah, ṭum hnih Mizoramah an ko chho a ni. JV NEIP hi an duh ang an zawhfiah tawh bakah, document an mamawhte an pek tawh avangin koh a ngai tawh lo.
JV NEIP hian tun hma chuan Aizawlah office an nei ṭhin a, tunah chuan an nei tawh lo. Delhi-a pan emaw, Mizorama koh chhoh emaw a ngaih phah a, chu chuan thubuai chhui chhung a tirei tih an sawi.
Thubuaiah hian document chi hrang hrang eng emaw zat a awm a, chu'ngte chu ACB chuan zir chiangin, zirchian hna an zo ṭêp tawh a, an zawh hunah an thil hmuh chhuahte Lokayukta-ah an thehlut ang.
Zawhna chhangin ACB hotute chuan, thubuai chhuinaah harsatna an tawh loh thu an sawi a, "Kan duh angin kan chhui thei a, zawhfiah ngaite pawh kan zawtfiah thei vek a ni," an ti.
Tarlan tawh angin, MNF party-a Vigilance department leh Legal Board-te chuan November 22, 2021 khan skywalk leh ropeway siamnaah thil dik lo a awm nia ngaiin Lokayukta-ah complaint an thehlut a ni.
December 7, 2021 khan chhui phal dilna Mizoram sorkara Vigilance deptt-ah thehluh a ni a; Vigilance deptt-in a zir chian hnuah Dec 17, 2021 khan chhui phalna a tichhuak a, ACB chuan December 22-ah an dawng. ACB-in chhui phalna an dawn hnuah hunpui a inṭan chhunzawm avangin January 2022 laihâwl velah an chhui ṭan a ni.
MNF-in complaint an thehluh chu Lokayukta chuan thu tlingah ngaiin thubuai an ziak lut a, an zir chian hnuah kalpui zel dan turah thutlukna an siam. Lokayukta chuan, thubuai chu a tìrah chuan Central Bureau of Investigation (CBI) chhuitir ngei turah a ngai a, mahse, preliminary inquiry chu ACB kutah a dah thung.