Mizoramah AAP member tur zawng dawn

Aam Aadmi Party (AAP)-a hmarchhak bial enkawltu Rajesh Sharma leh Mizorama AAP coordinator-te chuan nimin khan Aizawl Press Club-ah thuthar thehdarhtute an kâwm a, Mizoramah AAP a din theih nan membership drive an nei dawn tih an puang.

Rajesh Sharma chuan, Mizo ṭhalaite'n Delhi-a Arvind Kejriwal kaihhruai AAP sorkar hnathawh hrang hrang an hmuhin Mizoramah AAP din ve an duh niin a sawi a, "May 14, 2022 khan Mizorama mi pawimawh leh langsarte nen kan sawiho a, thla khat chhung membership drive neih ni se kan ti," a ti a; Mizoram mipuiin AAP din an duh a nih chuan theihtawp chhuaha hma an lâk dawn thu a sawi.

Mizoram AAP coordinator-te chuan, Mizorama AAP din turin district tinah member 50 tal awm a ngai tih sawiin, "Vawiin aṭang hian membership drive kan ṭan dawn a, central lama AAP hotute chuan hemi atan hian thla khat hun min pe. Mizoram mipui zingah AAP-a inziak lut an tam dan azirin party din a ni ang," an ti.

Coordinator-te chuan, AAP chu Mizoramah din a la nih loh avangin kum 2023-a Mizoram inthlanpuiah candidate an neih dawn leh dawn loh an la sawi theih loh thu an sawi a; member ni turin pawisa chawi a ngaih loh thu te, member ni duh tan phone number 8798173705-ah biak theih a nih thu te, ram veia siamṭha duh mi an zawn thu te, AAP kaltlangin ṭhalaite'n ram kaihhruai an tum thu te, mahni hlâwkna ûm tumte tan hmun a awm loh thu leh, ram siamṭha turin Mizoram mipui ṭawiawmna an mamawh thute an sawi bawk.