Petrol hralh theih zat bituk

Food, Civil Supplies & Consumer Affairs (FCSCA) director Ramdinliani chuan nimin khan hriattirna a tichhuak a; petrol pump-te'n lirtheia ṭum khata petrol an pek theih zat bituk a tarlang. Diesel erawh khuahkhirh a ni lo.

FCSCA Director chuan, Assam leh Meghalaya chhunga hmun ṭhenkhatah tuilian leh leiminin rél kawng leh national highway kawngpuite a tihchhiat avangin ram chhungah tuialhthei, a bikin petrol châwk luh a khaihlak thei dawna hriat a nih thu a tarlang a, "Petrol khaihlak vanga sorkar leh mipuiin harsatna lian zawk tâwk loa petrol mamawhtute'n rualkhai zawka an chan theih nan The Mizoram Trade Articles (Licensing and Control) Order, 1987-in thuneihna min pek angin khuahkhirhna siam a ni," a ti.

Petrol pump-te'n petrol an neih zat ni tin zing dar 9-ah FCSCA Deputy Director (G) emaw, Supply POL Report Group WhatsApp-ah hriattir ṭhin tur a ni a; tuialhthei an neih zat (dead stock tel loin) petrol-ah litre 5,000 leh diesel-ah litre 10,000 aia a tlem chuan FCSCA department hriatpuina leh phalna tel lo chuan hralh chhuah tawh loh tur a ni.