KHAWTHLIR

HSLC 2022 result
Mizoram Board of School Education (MBSE) chuan vawiin May 17 chhun dar 12:00 hian High School Leaving Certificate (HSLC) Examination, 2022 result a tichhuak dawn. Result hi MBSE Office, Chaltlangah leh website www.mbse.edu.in ah en theih a ni ang.

Thisen pe
KṬP, Bâktawng Pastor Bial chuan nimin khan Synod Hospital tan thisen unit 71 an pe a, petute mipa 61 leh hmeichhia 10 an ni. Baktawng Bial KṬP member-te hian Synod Hospital-ah kal chilhin thisen pek an huaihawt a ni.

Sorkar siam thei la awm lo
Mara Autonomous District Council (MADC) inthlan result puan a nih aṭangin ni sarih a liam hnuah pawh sorkarna siam thei an la awm lo a, sorkarna siam tumin political party-te an la inbe zui zel. Political party-te chu ṭum eng emaw zat inbe tawh mahse an la inrem thei lo a ni. Hetih lai hian, Governor thupek angin May 18, 2022 (Nilaini) hian MADC chairman tur thlan a ni ang.

Hun pawtsei
Mizoram sorkar chuan principal secretary (Finance & Taxation) Vanlalchhuanga, IAAS chu Mizoram sorkar hnuaia a awm hun chhung kum hnih atan a pawtsei. Vanlalchhuanga hi May 21, 2024 thleng Mizoram sorkar hnuaiah a thawk dawn a ni.

Heroin man
Champhai police-te chuan May 15, Pathianni tlai khan random checking an nei a, Mualkawi khaw daiah Lalrintluangi (46), Zokhawthar hnen aṭangin heroin gram 62 an man. Heroin hi tualchhunga hralhna ang chuan Rs 2,50,000 man a ni.

Dawr kâng
May 15, Pathianni zing khan Mamit Dinthar Vengah dawr pahnih a kâng a, thi leh hliam an awm lo. Mamit aṭanga thu dawn danin, Assam type-in pakhat, thingpui dawr leh eichawp dawr atana hman chu a kâng a, zinga kângmei chhuak hmutute'n ṭhelh tum mah se, an ṭhelh mit mai thei lo a, Fire department-te koh an nih hnuah ṭhelh mih a ni.