MNF-ah party dang mite pawh an leng - Dr R Lalthangliana

MNF adviser Dr R Lalthangliana, minister ni bawk chuan, MNF chuan sorkar hmasa thil tih pawh ni se, ram tana ṭha tur chu an chhunzawm zel thu leh, MNF party-ah Mizo zawng zawng, party dang mite pawh an len vek thu a sawi.

Dr R Lalthangliana hian nimin khan Hnahthial Electric Veng community hall-ah MNF South Tuipui Block-I Political Training-ah thu sawiin, "MNF danglamna chu, sorkar hmasa thil tih pawh kan ram tana ṭha tur chu a hnâwl ngai lo a, a chhunzawm zel. Kum 1998-ah kan sorkar a, sorkar hmasa Congress khan district thar panga a thu ringawtin an puang a, tihpuitlin hautak hle mahse Pu Zoramthanga kaihhruai sorkar khan kum 2003-a kan sorkar tàwp dawn khan pangngai takin kan kal pui thei a ni," a ti.

Kum 2008-a MNF sorkarin Hnahthial, Saitual leh Khawzawl district a puante chu Congress sorkarin kum 10 chhungin a tipuitling lo tih sawiin MNF Adviser chuan, "Kum 2018 November thlaah kan sorkar leh a, kan sorkar tirh aṭanga thla riat chhungin pangngai takin kan function tir leh hman a ni," a ti a; chief minister Zoramthanga chungah lawmthu sawi an bat nasat thu a sawi.

R Lalthangliana chuan, MNF sorkar chhungin Covid-19 bakah ran pûl hri léng, khawchhak lama lirnghing, ram kâng, ramri buai leh Myanmar ráltlante avangin harsatna tam tak an hmachhawn thu a sawi a, "Tun hnaiah a tharin kan kal ṭan ve dawn chauh a, i beidawng mai lo ang u. Kan thil tum a hlawhtlin zel nan Mizo zawng zawng - Congress, ZPM, BJP leh neutral mite Mizo hnam party-ah an leng vek a, lo lut zel turin ka sáwm a ni," a ti.

MNF Adviser chuan, la sorkar miah lote Mizoramah an sorkar a rin loh thu sawiin, "Lo sorkar palh pawh ni se, minister pawh la ni ngai lo kha CM ta se, thla tam an kal lo ang. An chhung ril kawrawngzia mi tam takin an hre lo," a ti bawk.

Inkhawmah hian MNF zawm thar mi 221 lawm luh a nih thu MNF thuchhuahin a tarlang.