MNF-in MADC-a an MDC tharte lawmna hun an buatsaih

MNF District Head­quarters, Siaha chuan nimin khan Mara Autonomous District Council (MADC) inthlan zawh tâka an party aṭanga MDC tling tharte lawmna hun an buatsaih a, MNF adviser Dr K Beichhua'n a hmanpui.

Dr K Beichhua chuan, MADC inthlanpuiah Pathianin member pakua a pe chu lawmawm a tih thu sawiin, MDC tharte chu Pathian leh kan ram tan tia mahni inphat ngam nun nei turin a fuih a, "MADC-ah sorkar theih kan duh, mahse, kan sorkar thei lo a nih pawhin eptu lamah huaisen tak leh rinawm taka ṭhut pawh kan huam. Min thawhpui thei an awm erawh chuan kawng zau tak kan hawng reng a ni," a ti.

MNF member-te chu 'Pathian leh kan ram tan' tia rinawm taka mipui tana ding an nih thu sawiin, "Cheng nuai sang khat pawha lei theih tur an ni lo. Mizoramah MNF chak takin a sorkar mek a ni," a ti a; inpawh taka state sorkarin a thawhpui theih leh pheikhai rual taka hmasawnna kawng a zawhpui theih sorkar din chu Mara ram mipui tan duhthusam a nih thu a sawi.