Ni 399 hnua hripui vei hmuh tlem ber ní

May 15, Pathianni khan swab sample 28 endik aṭangin Covid-19 vei mi pariat hmuh chhuah a ni a, kum khat chuang hnuah sample test tlem ber ni leh hripui vei hmuh tlem ber ni a ni. Nimin khan hripui vei dam tawh mi 24 chhuahtir an ni a, hripui vei thi an awm lo.

Pathiannia Covid-19 positive hmuh chhuahte chu mipa pathum leh hmeichhia panga niin, RAT hmanga hmuh vek a ni a, positivity rate chu 28.57% a ni. Hmanraw dang hmangin sample endik a ni lo. Hripui vei hmuh tharte chu Saitual district-a mi panga, Mamit district-a mi pahnih leh Aizawl district-a mi pakhat an ni.

May 15-a hripui vei hmuh zat pariat chu kum khat chuang hnua hmuh chhuah tlem ber ní a ni a; ni 399 kal ta, April 11, 2021 khan mi pasarih hmuh chhuah a ni.

Nimin tlai dar 5 thlenga dinhmun angin, chawlhkar hnih (ni 14) chhung a záwnin Mizo­ramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni a; tun May thlaah mi pakhat chiah thi a la awm.

IDSP record angin, Mizoramah Covid-19 vei 2,28,000 hmuh chhuah a ni tawh a, mipa 1,06,159 leh hmeichhia 1,21,841 an ni a, mipa aiin hmeichhia 15,682-in an tam zawk. Nimin tlai dar 5 thleng khan mi 2,27,057 (99.59%) chhuahtir an ni tawh a, mi 697 (0.31%) thi tawhin, enkawl mek mi 246 (0.10%) an awm.

Nimin tlai khan Sai­tual district-ah hripui vei enkawl lai 119 awmin, Mizorama district 11 zingah a tam fál rih a; district pali - Champhai, Kolasib, Lawngtlai leh Hnahthial district-ah hripui vei an awm rih lo thung.