Cabinet-in PwD Commissioner RR pawm ; MST Bus-ah hmeichhe kum 60 chin a thlawnin

Council of Minister-te Nilainia CS conference hall-a chief minister Lal Than­hawla hoa ṭhukhawm chuan, an thu ngaihtuah zinga 25 an pawm. An thu pawm zingah Persons with Disabilities (PwD) Commissioner lakna tur recruitment rules (RR) a tel a; hmeichhia kum 60 chin chu MST bus-ah a thlawna chuantir an ni dawn.

Cabinet meeting-ah hian agenda 27 a awm bakah, additional agenda pahnih chhawp chhuah a ni a, chu'ng zinga 25 chu pawm niin, pathum chu ngaihtuah nawn leh tura dah a ni.

Meeting chuan, an ṭhutkhawm hmasaa Social Welfare department directorate pahnih - Directorate of Social Welfare leh Directorate of Women & Child Development-a ṭhen a pawm tawh chu kalpui a nih theih nan dan pangngaia tih ni se, a ti a; Health & Family Welfare department hnuaia AYUSH Directo­rate siam pawh a thuphungin an pawm.

Meeting-in a pawm zinga mi, 'Proposal for obtaining approval of Council of Minister for granting Government Guranteed Deed to Chakma Autonomous District Council (CADC)' chu CADC hnuaia thawkte'n HUDCO hnuaia loan pek tur cheng vbc. 20 pûktirna a ni.

Vanglaini palai zawhna chhangin District Council & Minorities Affairs (DCMA) hotute chuan, CADC hnuaia thawkte hnena loan pek tur chu Mizoram sorkarin a pek ṭhin thu sawiin, "Tun hi ṭum ruk an pekna tur a ni a, tun hma chuan DCMA Secretary-in agreement deed a pawm thei a, mahse, dan tihdanglam a ni a, Council of Minister pawmpuina a ngaih tawh angin, Nilaini khan an ngaihtuah a ni," a ti.

DCMA hotute chuan, Council of Minister-in agreement deed a pawm tak chu CADC hnuaia thawkte'n HUDCO hnuaia loan an pek tur cheng vbc. 20 pawmsakna a ni tih an sawi a, "An hlawh aṭangin loan an rulhna tur hi laksak ṭhin an nih avangin an rûl ṭha ṭhin," an ti.

Mizoram sorkarin January 22, 2016-a PwD commissioner B Sairengpuii a bân hnua a thlaktu tur lakna tur Cabinet meeting-in a pawm tak, The Mizoram Commissioner for Persons with Disabilities (Recruitment and Conditions of Service) Rules, 2016 ang chuan, PwD Commissioner thlangtu tur chu Chief Secretary kaihhruaina hnuaiah Search Committee din a ni dawn.

Social Welfare secretary P Lalchhuanga hnen aṭanga Vanglaini thu dawn danin, DPAR-in notification a chhuah ang a, Search Committee din a ni ang. Search Committee-ah hian Chief Secretary chairman a ni ang a, Social Welfare Secretary chu member secretary niin, DPAR Secretary chu member a ni ang.

Search Committee hian PwD Commi­ssioner tur an thlang dawn a, an mi duh zawngte chu sorkarah thlenin, sorkar chuan a mi duh zawng a lo thlang leh dawn a ni.

PwD Commissioner ni tur hian graduate chin, state leh central sorkar hnuai, public undertaking, etc.-a group A officer hna kum 10 aia tlem lo thawk tawh nih a ngai a, kum 10 an thawh chhung hian kum thum tal rualbanlote kaihhnawih lamah an thawk tur a ni. A term chu kum thum chhung emaw, kum 65 tlin thleng a ni a, kum 65 an tlin hma chuan vawi hnih a pawhsei theih.

Cabinet Meeting-in an pawmte
w The Mizoram Commissioner for Persons with Disabilities (Recruitment and Conditions of Service) Rules, 2016
w The Mizoram Food, Civil Supplies and Consumer Affairs Service (Amendment) Rules, 2016
w Assistant Registrar of Cooperative Societies post pahnih
w Mizoram State Cooperative Service hnuaia Grade IV-te encadred
w Deputy Secretary post pathum MSS Rules 2007 encadred
w Performance Monitoring & Evaluation System hnuaia Results Framework Document kalpui mek department 44 leh district pariatte final achievement chungchang
w The Mizoram Entry Tax, 2015 hnuaia chhiah lak theih thil (taxable item) belh
w Mizoram Aided Schools Employees (Death-cum-Retirement Gratuity) Rules, 1990 siamṭhat
w The Mizoram Regularization of Contract Employees Scheme, 2008 hnuaia para 4(2) ngaihhnathiam (relax)
w Government of Mizoram Regularization of Contract Employees Scheme, 2008 kaltlanga contract-a thawk mi 12 dahngheh
w Department hrang hrang hnuaia statistical post 20, District Research Offices/Directorate of Economics & Statistics/ Planning & Programme Implementation Department-ahte sawn (transfer)
w Commerce & Industries department hnuaia deputy director (accounts) post joint director (accounts)-a hlankai
w Hmeichhe kum 60 chin, Mizoram state transport bus service-a a thlawna chuan theihna (free pass) pek
w Gauhati High Court hnuaia Aizawl Bench-a joint registrar leh deputy registrar post khat ve ve siam
w Mizorama Lokayukta din a nih thei nan post 35 siam
w Proposal for Obtaining Approval of Council of Minister for Granting Government Guranteed Deed to Chakma Autonomous District Council
w The Government of Mizoram Regularization of Contract Employees Scheme 2008 leh recruitment rules dangte behchhana Information & Communication Technology department-a contract-a thawk mi pariatte dahnghehna tura ngaihnathiamna (relaxation) siam
w Draft Solar Power Policy of Mizoram 2016
w Draft Mizoram Electrical Licensing Regulations, 2016
w Art & Culture department hnuaia contract-a thawk (technical assistant leh assistant superintendent of archives) dahngheh
w The Mizoram (Land Acquisition, Rehabilitation & Resettlement) (Amendment) Bill 2016
w Tourist officer kum nga contract basis-a thawk tawh dahngheh chungchang
w Health & Family Welfare department-a contract a thawkte dahngeh an nih thei nana The Government of Mizoram Regularization of Contract Employees Scheme 2008 hnuaia para 4(2) ngaihnathiam
w District Planning Committee din
w The Mizoram (Land Acquisition, Rehabiliation & Settlement) (Amendment) Ordinance, 2017