LADC MDC 11-in bânna thehlut

Lai Autonomous Dis­trict Council (LADC)-a member of district council (MDC) 11-te chuan, chief executive member (CEM) VL Hmuaka an duh loh avangin nimin khan nihna an chelhte aṭanga an bàn thu LADC CEM hnenah an thehlut.

MDC zinga bânna thehluttute chu execu­tive member (EM) paruk - T Zakunga, C Lalneihkhuma, C Sangchhunga, Lal­tlawm­lova Chinzah, KC MS Dawngliana leh L Lawmkima te, Planning vice chairman C Lallung­muana, adviser to CEM JC Ngurluaia, deputy chief whip K Vanlalsanga, Town Committee chairman N Sangnawni leh deputy chairman Suresh Chakma te an ni.

Mi 11-te'n bànna an theluh chhan an sawite chu - LADC rorelna a hlawhchhama an hriat vang te, House-ah leader-in an party a mualphopui ziaha an ngaih vang te, excutive meeting leh CLP meeting-ah CEM a mut­hilh ṭhin vangte leh CEM-in elected member aia official-te a ngaih pawi­mawh zawk vangte a ni.

Thu dawn danin, MDC 13 chuan Revenue chang mektu EM T Zirkunga chu CEM atan an duh a ni.

LADC-ah hian thlan tlin MDC 25 an awm a, ruat seat-ah member pathum awmin, MNF-in MDC pariat an nei a, member dang 20 chu Congress vek an ni.