MṬKP-in AIDS vei ṭanpuina thawh rel

Mizoram Ṭhalai Kris­tian Pawl (MṬKP) chuan, nimin khan niléngin Lunglei Zotlang North BCM biak-inah rorel inkhawm vawi 63-na an hmang a; HIV/AIDS vei ṭanpui ngai zualte ṭan­pui­na turin unit tinah inkhawm vawi khat thawh­lawm thawh an rel.

MṬKP Rorel Inkhawm hi MKṬP Inkhawmpui neih loh kuma neih ṭhin a ni a; tun ṭuma rorel hi MṬKP president Rev. JC Vanlalluaia'n a kaihruai a, rorel palai 600 vel an tel. Agenda pangngai 33, MṬKP aṭanga thu lut tlem azawng leh kum 2017-18 budget turte an ngaihtuah a ni.

Rorel inkhawma thurel zingah, MṬKP thu zir atan BCM Thurin hman te, ṬKP member thi an awmin MṬKP rorelnaah sûnna hun hman ṭhin te, mihringa sumdawnna leh ruihhlo ṭhat lohzia inzirtirna kawnga hmalak chhunzawm te, MṬKP huapin HIV/AIDS vei ṭanpui ngai zualte ṭanpuina turin unit tinah inkhawm vawi khat thawhlawm MṬKP-ah chhûn luhte a tel. Kum 2017-18 budget atan Rs. 9,50,000 an pawm.

MṬKP-ah hian pastor bial 81-a unit 412-ah member 43,220 an awm a, mipa 26,976 leh hmeichhia 16,244 an ni.

Kum 2019-a MṬKP inkhawmpui vawi 46-na chu Tlabungah neih a ni dawn a, kum 2018-a rorel inkhawm vawi 64-na chu Hnahthial South-ah neih a ni ang.