Rinmawia leh Sangkunga an dang zel Chief Minister-in MNF thil tih pawi a ti

MNF-te chuan LEIT minister Lalrinmawia Ralte leh MYC chairman T Sangkungate pisa kai tur an la dan chhunzawm zel a, vawiinah pawh dan chhunzawm an la tum. Hetih lai hian, chief minister Lal Thanhawla chuan, MNF-te'n Lalrinmawia Ralte leh T Sangkunga an dang chu pawi a tih thu a sawi.

Nimin chhun khan Lalramzauva, West Bunghmun-in social media-a Lalrinmawia Ralte a bangla kawta dan a nih chungchanga a thu post chu thu belhchian dâwl lo ngaiin, Lalramzauva awmna LEIT Minister bangla an pan a; police nen hun eng emaw chen an indang buai a ni.

MNF-te phût angin Lalram­zauva hian bangla kawt aṭangin social media-a a thu post chu thu belhchian dâwl lo a nih thu a sawi hnuah leh social media lama ngaihdam dilna a post hnuah, Lalramzauva hi police venhimna hnuaia hruai chhuah a ni a, buaina a awm zui lo.

Minister Lalrinmawia Ralte leh MLA T Sangkunga te MNF-in an dan chungchang hi CM Lal Thanhawla chuan nimina Sesawnga MRB branch a hawnnaah a sawi lang a, "Party muthlu leh tlachhe mek inchawh thawh leh tuaithar nan hetianga vantlang tana harsatna siam hi ringtute tih turah ka ngai lo," a ti.

Lal Thanhawla chuan, NIAS chu zirna in lem nia sawi chungchanga an zawhna chu rang taka chhan a nih thu sawiin, NIAS hi West Bengal sorkar hnuaia in register thlap an nih thu an rawn sawi a, "An lehkha rawn thawn leh Mizo zirlai he zirna in hnuaia la zir mekte hming list pawh ka kawl vek a, tute emaw ti ṭha peih lo, zir chhunzawm duh lo ṭhenkhat an awm laiin mi 20 chuang zirna chhunzawm an la awm," a ti a; tuna la zir mekte'n anmahni vanga miin politics an khel chu pawi an tih hle niin a sawi.