Rev.Dr. Lalsawma thlah liam a ni

Mizo zinga M.Th zo hmasa ber, Mizoram Presbyterian Kohhrana pastor hriat hlawh, Rev.Dr Lalsawma (87) s/o Rev. Langlura (L) chu nimin zing dar 2:25 khan Aizawl Hospital-ah a thi a; a nupui Lalnuntluangi leh a fapa pali leh fanu pahnih a kalsan.

Pastor a nih piah lamah vantlang tana a hnathawh hrang hrangte avangin India rama civil mite chawimawina sang, Padma Shri pawh a dawng a ni.

Rev. Lalsawma hi nimin chhun dar 12:30 khan Mission Vengthlanga an inah thlahna hun hman a ni a, chawhnu dar 2-ah Mission Vengthlang biak-inah Synod moderator Rev. Lalzuithanga'n a vui leh a ni.

Rev. Lalsawma hi Sailam khuaah 1930-ah a piang a, chumi hnuah Khawbungah an pêm. Kum 1955-a Licentiate in Theology (L.Th) a zo a, BD a zawh leh hnuah kum 1968-ah Master of Theology (M.Th) a zo.

Kum 1955-ah pro. pastor a ni ṭan a, kum 1958-ah pastor hna a thawk ṭan. Pator bial hrang hrang a enkawl tawh bakah, Aizawl Theological College-ah registrar leh principal a ni tawh a; Synod Moderator, Secretary leh Synod Executive Secretary a ni tawh.

Mi 1,909 baptisma a chantir a, nupa tuak 290 a inneihtir a ni. Presbyterian Church of India (PCI) Assembly-ah Secretary leh Moderator a ni tawh a, National Christian Council of India (NCCI)-ah Executive Committee member a ni tawh bawk.

Rev. Lalsawma hian rambuai laiin Mizoramah remna leh muanna a awm theih nan nasa takin tha thawhin, Christian peace Committee-ah a tel a; Zoram Kohhran Hruaitute Committee-ah hruaitu a nih ṭhin bakah, kum 1966 vela Aizawl khawpui thianfai tur leh mipui mangang ṭanpui tura din Citizens’ Committee-ah a tel.

Kum 1997-a Bru helte'n bus an hâl a, Forester pakhat an thah leh sorkar hnathawk mi pathum an hrên chungchangah pawh Mizoram sorkarin BNLF hel be turin palaiah a hmang a ni.

Lalsawma hi thu ziak mi a ni a, leh­khabu 21 a tihchhuah bakah, article ṭhahnem tak a ziak a, English-in article panga a ziak bawk.