KHAWTHLIR

Thisen pe
Nimin khan Lunglei College-in an college-ah blood donation camp an buatsaih a, thisen unit 89 an pe; Lunglei Civil Hospital tan thisen unit 54 leh Christian Hospital, Serkawn tan unit 35 an pe ni. Johnson College NSS unit-in an college-ah Aizawl Civil Hospital tan unit 80 an pe a, a petute mipa 57 leh hmeichhia 23 an ni. Tuipuiral Zirlai Pawl pawhin an din champha lawm nan Aizawl Civil Hospital-ah pein, mipa 57 leh hmeichhia 17-in unit 74 an pe a ni.

Tlan phal lo
Traffic SP chuan thupek chhuahin, Chanmari West kâwipui leh Lalsangliana Filling Station, Edenthar Veng inkar kawngpui chu PWD-in an siam ṭhat dawn avangin nimin aṭang khan hnathawh zawh a nih hma chuan zing dar 9 aṭanga tlai dar 4 thleng lirthei tlân phal a nih dawn loh thu a tarlang.

Driver training
Road Safety Week pual­in, nimin khan Kolasib khawpui chhunga taxi leh auto-rickshaw khalh­tute tan, Kolasib-a IPR conference hall-ah dan leh hrai leh nungchang mawi inzirtirna hun buatsaih a ni.

Aadhaar sawiho
Nimin khan Lunglei DC conference hall-ah Aadhaar chungchanga District Level Committee an ṭhukhawm a, enrolment-a harsatna a tlem zawk nan document hrang hranga hming ziah danah mipui fimkhur lehzual tura zirtir ṭha an ti. Meeting-a tarlan danin, Lunglei district-ah hian February 3, 2017 thleng khan mi 90,051-in biometric enrolment an ti tawh a, chu chu mihring awm zat aṭanga chhûtin 50.10% a ni.

Digidhan Mela
Nimin khan chief secretary Lalmalsawma hoin sorkar official-te an ṭhukhawm a; sorkar laipuiin pawisa note tel loa mipuite'n mobile phone hmanga thil an leia an hralh theihna tur leh, cashless payment uar chhoh zel tum a nih vanga thil leitu leh sumdawngte'n thil tih dan tur an hriat chian theih nana February 14-15-a Millennium Centre chung záwla ‘Digidhan Mela’ buatsaih tum chungchang an sawiho.