Rethei leh hausa kár tihzîm kan tum - CM

Mizoram Rural Bank branch 82-na, Sesawng khuaa din thar chu nimin khan chief minister Lal Thanhawla'n a hawng. Chief Minister chuan, mirethei leh hausa kar tihzîm an tum thu a sawi.

MRB hawnna puala Sesawng community hall-a inkhawm buatsaihah CM Hawla chuan, "Tunlai khawvelah bank tel loin kan awm thei tawh lo a, pawisa note tel lo sumdawnnate uar deuh deuh a ni tawh. Mizoram sorkar pawhin NLUP leh hmalakna dangah bank-te nen nasa takin kan thawkho a ni," a ti.

Chief Minister chuan, nationalised bank hrang hrangte Mizoramah branch an hawn theihna atan sorkar laipui an ngen fo thu sawiin, bank eng emaw zat chuan district headquarters leh RD block hrang hrangah an hawn tawh thu a sawi.

NLUP chhunzawm zel tur a nih thu sawiin Lal Thanhawla chuan, "A tihchangtlun nan NEDP pawh chak takin kalpui ṭan mek a ni. Ei ṭâwk ṭâwk economy aṭangin market oriented economy-ah hmasawnna kalpui chu kan sorkar thil tum lian ber a ni. Mi rethei leh mi hausa kar tihzîm kan tum, " a ti.

Chief Minister chuan, Mizoram chu thlai eng pawh ṭhat duhna ram a nih thu sawiin, eizawnna ngêlnghet neih a nih theih nan rinawm taka hna thawk turin mipuite a chah.

Bialtu MLA Dr H Ngur­dingliana pawhin thu sawiin, a bial chhungah MRB-in branch thar an hawng chu lawmawm a tih thu a sawi. Dr H Ngurdingliana hian mi harsa 10-te hnenah bank account an hawnna turin MRB hotute hnenah Rs. 10,000 a hlan a ni.