Sangha zirhona hun buatsaih

Nilainia ṭan, Mizoram Fish Festival pualin nimin khan IPR directorate auditorium-ah ‘Development of Fisheries,Conservation and Propagation of Indigenous Fish Species of Mizoram' buatsaih a ni a, Fisheries minister Dr BD Chakma-a'n a hmanpui.

Dr. BD Chakma chuan, mihring hriselna atana protein ṭha tak tak sanghaah a awm thu sawiin, "Sangha ei tam chu an thluak a ṭha an tih ṭhin angin, sangha hi kan taksa tan thil ṭha tak leh hlu tak a ni. Mihring kan pun zelnaah ei tur mamawhna a sang vel zel a, chu mamawhna chu ûm pha turin theih tâwkin nungcha leh thing leh maute humhalhna rilru pu chung zelin hma kan lak a ngai," a ti.

Fisheries Minister chuan, Mizoramah sangha khawi theihna ram hectare 24,000 a awm laiin, hectare 4,850 vel chauh hman ṭangkai a la nih thu sawiin, "Mizorama sangha zawrh chhuah dan pawh a la hniam hle a, heta ṭang hian sangha khawi lamah ṭan lak nasat a ngai hle a ni tih a hriat theih," a ti a; sawihonaa telte chu thluak sáwr bing a, sawihona hmang ṭangkai ngei turin a chah.

Sawihonaah hian mithiamte'n thupui hrang hrang hmanga thu an sawi bakah, sangha chi hrang hrang chanchin zirhoa sawiho a ni.