Kawlphetha man tihsan tum sawiho

Kum 2017-2018 a electric bill tihsanna tura Power & Electricity department-in rawtna an thlen chung­changah, Joint Electricity Re­gulatory Commission (JERC) chuan nimin khan IPR directorate conference hall-ah mipui ngaihdan ngaih­thlakna hun an buatsaih.

Meeting hi kawlphetha hman man tihsan dan tur chungchanga Mizoram Consumer Union leh PRISM-ten ziaka thu zawh chianna (written objection) an siam sawihona tura buatsaih a ni a; mipui­te tana harsatna thleng lo thei ang bera kawlphetha hman man siam tura an rawtnate ngaihtuah a ni. P&E depart­ment hotute chuan, electric hman man chu awm­ze nei taka chhût a, mite tana harsatna siam lo thei tur ang ber leh anmahni department aggregate revenue requirement (ARR) ngaihtuah chung zela an siam ṭhin a nih thu an sawi.

Tun dinhmunah kawl­phetha hman man hi unit khat zelah Rs. 4.14 a ni a, financial year thar (2017-2018) ah chuan Rs. 4.75-ah tihsan tum a ni a, a sanna tur chu 6.74% a ni.