Congress leh MNF hnâwl turin mipui ngen

MPC party chuan thuchhuah siamin, kum 1984 hnu lama Congress leh MNF party-te'n rorelna an chan aṭanga tun thlengin Mizoramah hmasawnna ruhrel, ram leh mipuite tana chhenfâkawm tak sawi tur, hmuh tur leh chhawr tur a la awm fumfe lo niin an tarlang a; MNF leh Congress party-te chu hnâwl ngam turin mipui an chah.

MPC thuchhuah chuan, Congress leh MNF-in sorkarna an chan chhunga ramin hma a sawn chak loh chhan chu, ram leh hnam hmangaihna tak tak rilru pua ram rawngbawl hna an thawh loh vang a nih thu an sawi a, "Congress leh MNF hian kan ram an kaihruai leh a nih nghat chuan kan ram dinhmun chu tun aia nasa hian retheihna leh pachhiatna khurah a tlu lut ngei dawn," an ti.

Mizoram chu chhiat­na khura pil tur chhan­chhuaka tungding leh turin MPC party-in policy leh programme mumal tak an nei nia sawiin, MPC chuan, "Kan ram leh kan hnam hmasawnna leh damna tling zo kan nei a, a tihlawhtling turin a ngaihna kan hria a, sor­karna kan chelh chhung pawh khan hmalakna thui tak kan lo kalpui tawh a ni," an ti a; an policy leh programme tihhlawhtling turin Mizoram mipuite ṭawiawmna an ngen a ni.