Bawlhhlawh sâwngbâwl dan sawiho

Mamit District Sanitation Task Force chu nimin khan an chairman Lalrozama, bawrhsap hoin DC conference hall-ah an ṭhukhawm a; Mamit Town Solid Waste Management Bye-Laws, 2020 chungchang an sawiho.

Meeting-ah hian District Urban Development Office-in Mamit Town Solid Waste Management Bye- Laws, 2020 an siam chu thlirho a ni a, an pawm. Bye-Laws 2020 pawm takin a tum ber chu - Mamit khawpui chhunga bawlhhlawh (solid waste) uluk taka sâwngbâwl leh tihral dan tur leh, mipuite'n an zawm ngei tur dan leh hrai chungchang a ni.

Bawlhhlawh sâwngbawl chu sorkar leh mipui thawhhona, public private partnership (PPP) mode-a kalpui tum a ni a, chhungkaw tinin thla khatah Rs. 50 an thawh ṭhin ang. Bawlhhlawh ṭawih thei leh ṭawih thei lo bakah, bawlhhlawh chi hrang hrang thliar hran a, paih dan tur leh dan zâwm lote hrem theihna turte tarlan a ni. Dan hi siamṭhat ngaite siamrem a nih hnuah thuneitute'n an tichhuak dawn a, hman ṭan hun tarlan a ni ang. 

Mizoram pum huap khawpui fai inelna kalpui mek a nih angin, mahni in leh a vel tihfaia ṭan la ṭheuh turin Mamit mipui an ngen a; kawngpui hrúla in sakna bungrua leh hmanraw hrang hrang dahte chu tun kar chhung ngeia senghawi turin an ngen bawk.

Ṭhutkhawmah hian DRDA Project Director, Additional SP, sorkar depart­ment officer dangte leh YMA, MUP leh MHIP hruaitute an tel a ni.