Sorkarin NIAS zir chiang tur din a inhuam ; HM-in pisa kai tur dan titawp turin a ngen

Home minister R Lalzirliana chuan Nalanda Institute of Advance Studies (NIAS), Kolkata-a chu zirna in lem (fake institution) a nih leh nih loh zir chiang tur committee din sorkarin a inhuam tih sawiin, MNF-te chu LEIT Minister leh MYC Chairman pisa kai tur an dan chawlhsan tawh turin a ngen.

Home Minister hian nimin khan Congress Bhavan-ah thu sawiin, "Sorkar chuan MJA, MZU, MZP leh MSU aiawh mi pahnih ṭheuh NIAS zir chiang tur hian Kolkata-ah tirh a inhuam a ni. Fake institution tih hi a dik a nih chuan sorkarin zirlai a tír tawh ngai lo ang. Zir chiangtute'n zirna in dang ṭha zawk an recommend-te a nih chuan chu'ngahte chuan kan tír thei ang," a ti.

R Lalzirliana chuan, LEIT Minister leh MYC Chairman-te pisa kai tur dangtu MNF-te chu thu dik zirchiang tur committee din a nih dawn tho chuan, ni sa hnuaia ṭhut chawlhsan a, hahdam tawh turin a ngen.

Home Minister chuan, "Sorkarin sum tak tak sêngin ṭhalaite hmakhua ngaiin an eizawnna theihna tur a dapsak ṭhin. Sorkarin sum tam tak a sênnaa mi tumruh lo leh thatchhiate fuih pawrh theiha politician-te an awm hi pawi ka ti hle," a ti.

HM Zira chuan, NIAS chu zirlai pakhatin fake institution tia a aupui thu sawiin, "A zir chiangtute chuan zirna in lem a ni lo an ti. Duh ang anga awm theih loh avangin vui tur kan ni lo," a ti a; retheihna aṭang lo chuan nawmsak chu thil harsa tak a nih thu a sawi.

MNF-te chu thil hre chiang loa thil ti-ah puhin R Lalzirliana chuan, "Thil hre chiang loa an ti vek hi a nihna tak an hriat hun chuan anmahni zawk hian harsatna thlentu hi an la haw zawk ang tih a hlauhawm khawp mai. FIR-te pawh a lakah an la thehlut duh hial zawk mai thei a ni," a ti.

Home Minister chuan, Mizoram sorkarin ṭhalaite hmakhua ngaiin MYC kaltlangin an eizawnna tur a dappui tih sawiin, "Chu'ng atana inbuatsaihna atan chuan sum leh pai awm ang ang pawh an dap khawm a ni mai thei," a ti a; sorkar thil tum a hlawhtlin theihna atan ṭhalaite'n tumruhna leh taimakna an neih a pawimawh thu a sawi.

R Lalzirliana chuan, tumruhna leh taimakna tel loa hlawhtlin tum ṭhalaite zingah an tam chuan sorkarin a beisei angin ṭhalaite hmakhua a ên loh tur thu a sawi bawk.