Hindi zirtirtute'n Pen Down Strike an ṭan

Mizorama Centrally sponsored scheme (CSS) hnuaia Hindi zirtirtute chuan, thla 10 chhung hlawh an lak tawh loh vanga lungawi lohna lantir nan nimin aṭang khan Pen Down Strike an ṭan.

Mizoram CSS Hindi Teacher Association (MCHTA) chuan thu­chhuah siamin, nawrh an huaihawt chhan an tarlang a, "Thla 10 chhung hlawh kan lak tawh loh avangin harsatna kan tâwk nasa a, kan thawh chhunzawm leh zelna turah Mizoram sorkar aṭangin thu lawmawm kan la hriat loh vang a ni," an ti.

MCHTA chuan, Hindi bakah, subject dang an lak zawng zawngte internal mark an pek tawh leh la pek lohte chu result-ah a lang thei dawn lo tih sawiin, "Kan subject lak zawng zawngah result a awm dawn lo tih kan inhriattir nghal a ni," an ti a; zirlaite leh an nu leh pate hriatthiamna an ngen.

MCHTA chuan, an thawh hlawh pe thuai turin sorkar an phût a; "Mizoram sorkar hian Central guideline hre reng chunga min la a ni a, chuvangin, kan thawh chhunzawm zel theih nan a mawhphurhna hlen vat turin kan phût a ni," an ti.

CSS hnuaia zirtirtute hian vawiinah pawh Pen Down Strike hi an la chhunzawm zel dawn a ni.