MNF-in pisa kai tur an dan chhunzawm

MNF party mite chuan nimin khan LEIT minister Lal­rinmawia Ralte leh Mizoram Youth Commission chairman T Sangkunga te pisa kai tur an dang leh a, ni li an danna a ni.

Sorkar hotu pahnihte pisa kai tur an dannaah hian MNF seniot vice president leh Action Committee chairman Tawnluia chuan thu sawiin, "NIAS, zirna in lema zirlaite tirh an ni hi zirlaite leh ṭhalaite tan ànchhia a tling a, thil mumal lo leh fel lo a tam hle a, a lang chhuak mek zel a ni," a ti.

Chief minister Lal Thanhawla February 9-a Sesawnga MRB branch a hawnnaa thu a sawiah, NIAS-ah zirlai 20 an la awm thu a sawi chu chhangin Tawnluia chuan, "January 24, 2017 khan LEIT secretary Pu Benjamina'n thuthar lakhawmtute a kawmnaah zirlai pariatin an la zir mek thu a lo sawi tawh a, an thu a inkalh hle a ni. Tun kar hnih chhung hian zirlai 12 an lo admit belh em ni?" a ti a; NIAS-a zirlai 20 la zir mek list a kawl thlap anga a sawi chu a rang thei ang bera Mizoram mipui hriata puangzar turin an phût tih a sawi.

MNF Sr. Vice President chuan, CM-in NIAS chu regis­tration mumal tak nei anga a sawi chu chhangin, "CM hian NIAS hi zirna in ang ni loin, NGO ang chauha register a ni tih lo hre tawh turin kan duh," a ti.

NIAS chu Anamalai University-a distance education centre anga sawi awm ṭhin pawh thu dik lo a nih thu sawiin, "Soorya Institute of Management Studies nena kum khat chhung atana in collaborate mai chauh an ni," a ti.