District MJA-in inkhawmpui hmang

Mizoram Journalist Association (MJA), Kolasib district chuan nimin khan an Press Club-ah General Body Meeting an nei a; Serchhip district MJA pawhin Sub-Hqrs. YMA Meeting Hall-ah Annual Conference vawi 10-na an hmang a, chief minister Lal Thanhawla'n a hmanpui.

Serchhip MJA Annual Conference-ah hian Chief Minister chuan, state dangah Mizorama chanchinbu mite intêlkhawmna anga ṭha a awm ve ngai loh thu sawiin, Mizoram chu Kristian ram a nih avangin thu dik leh thu taka inchâwm ṭha a tih thu a sawi a, "Ram inrêbawlnaah dik lo hulhual kan hriatah chuan sorkar pawh kan sawisel tur a ni a, mahse, constructive a ni tur a ni a ti," a ti a; mipuite tichiaitu ni lo a, thu dik thlentu ni turin a chah.

CM Lal Thanhawla chuan, Mizorama chanchinbu mite damloha inenkawlna leh chhiat tawha inràlna atana hman ṭhin, Mizoram Journalist Welfare Fund chu tihpun a nih tur thu a sawi a; Serchhip MJA-te'n Press Club an mamawh thu an lo thlen chungchangah, Press Club hmun tur an neih veleh a sak bul ṭanna tur Rs. 10,00,000 a pek nghal tur thu a sawi. CM hian Serchhip MJA hnenah hian Rs. 50,000 a pe a ni.

Serchhip district MJA conference hi MJA Gen. Hqrs. aṭangin hruaitute'n an hmanpui a; chawhnuah vice president C Ramengmawia kaihhruaiin MJA chhung thil an sawiho a ni.

Kolasib MJA General Body Meeting chu an president C Thanmawia'n a kaihruai a; Kolasib-a Synod Family Guidance & Counseling Centre-a counsellor Rev. Samuel Lalrinsanga'n fuihna hun hmangin, "Journalist chu a huaisen tur a ni a, thu dik a ṭan tur a ni. Ṭawngkam chhuakah fimkhur a ṭul," a ti.

Kolasib MJA inkhawmah hian Kolasib district-a MJA member leh member la ni lo, media-a thawkte an tel a; chawhnu lamah MJA thil pawimawhte an sawiho a ni.