Lawngtlai District Jail enfiah

Lawngtlai District Development and Vigilance Forum (LDDVF) hruaitute chuan, nimin zing khan Lawngtlai District Jail an tlawh.

LDDVF hruaitute hi District Jail superintendent HC Lallianvuta'n lo dawngsawngin, an dinhmun leh harsatna tawhte a tarlang. Jail Superintendent chuan, êng neih loh cháng a awm zauh zauh thu te, zan lama êng an neih lohin a buaithlak zual thu te, Jail chu nurse pakhatin a awmchilh thu leh, nikum chhung khan doctor-te'n vawi khatmah an tlawh loh thute a sawi.

Jail Superintendent chuan, jail-a tángte chu ni 14 dan zelah an chungthu ngaihtuahsak tur an nih laiin, Court session mumal neih a nih ṭhin loh avangin harsatna an tawh thu a sawi bawk.

Lawngtlai District Jail-ah hian mi táng 14 an awm a, thawktu mi pariatin an enkawl a ni.