NIAS chungchang PM-ah thlen Zirlaite'n zangnadawmna pek an phût

Nalanda Institute of Advance Studies (NIAS), Kolkata-a Bachelor of Hotel management (BHM) zir tura Mizoram sorkarin a tirhte zinga mi C Laltlanmawia leh zirlai ṭhenkhat nu leh pate chuan, NIAS-a tirh an nih vanga an sum sen thlawn tawhah zangnadawmna pe turin Mizoram sorkar an ngen a; NIAS chungchangah rorelna dik a thlen theih nan Prime Minister hnenah lehkha an thehlut tih an sawi.

C Lalthanmawia leh NIAS-a zirlai ṭhen­khat nu leh pate hian nimin khan Aizawl Press Club-ah thuthar thehdarhtute an kâwm a; C Lalthanmawia chuan, NIAS-a zirlai tirh chungchanga thil dik lo, document nen puanzar a ni tawh chung sorkarin hma a la ṭha duh lo leh ACB-a FIR thehluh a ni tawh pawh a reh zui reng avangin Prime Minister leh Mizoram Governor hnenah an zualko tih sawiin, "Rorelna dik a thlen theih nan February 9, 2017 khan PM hnenah harsatna kan tawh chungchang leh a rang lama hma min lakpui tura ngenna kan thawn a ni," a ti.

C Lalthanmawia sawi dan­in, Prime Minister hnenah hian email hmangin lehkha an thawn a; lehkhaah chuan NIAS-a harsatna an tawh dan te, Mizoram Building and Other Constructions Workers Welfare Board (MBOCWWB) kal dan dik lo leh eirukan awm ngeia an hriat dante a ziak a ni. A lehkha copy hi nimin khan Governor Lt.Gen. Nirbhay Sharma hnenah an pe bawk.

NIAS chu zirna in ṭha lo leh a lem a nih vang leh, Mizoram sorkar nen MoU an ziah anga an kal loh vangin sum an sen tam phah hle tih sawiin, Lalthanmawia chuan, "Kan sum sen tawhah zangnadawmna Chief Minister hnena April 17, 2016-a kan dilna hi sorkar hian min tihhlawhtlinsak thuai turin kan ngen a ni," a ti.

MZP-MSU Search Committee hnena hma lakpui tura an ngenna chu hmalakna a awm loh avangin February 9-ah Aizawl City College Joint Students Union-ah hma lakpui turin an ngen tih a sawi.

C Lalthanmawia chuan, CM Lal Thanhawla'n Sesawnga MRB a hawnnaah, NIAS-ah Mizo zirlai 20 an la awm anga a sawi leh NIAS chu West Bengal sorkar pawmpui thlap anga a sawi chu a dik lo niin a sawi a, "NIAS hi institution ang ni loin, NGO anga in register a ni zawk a, khawi university-ah mah affiliate a ni lo," a ti. Document a thil telah chuan, NIAS hi West Bengal sorkara Societies registration Act, 1961 hnuaiah a inziak lut a, registration no. chu 46612 of 2007-2008 a ni.

Lalthanmawia sawi danin, NIAS-in university a zawmpui nia sawi, Anamalai University chu direct-in a zawm lo a, Anamalai University zawmtu Soorya Institute of Management Studies nen kum 2014-2015 chhung atan an thawhho avangin Anamalai University zawm anga sawi a ni.

RTI Act hmanga a zawhna chhannaa a lan danin, NIAS hi endik turin sorkarin ṭum thum - March 2016, May 2016 leh January 2017-ahte officer a tír tih sawiin, "Hei hian zirna chiangkuang lo a nihzia a tilang. Zirna pangngai ni se vawi khat bak endik a ngai lo ang," a ti.