Hlâwk zawka ar vulhna tur tlangzarh

Ar vulhtute'n hlawk zawka ar an vulh theih­na atana ruahman, Integra­ted Management System (Kelkang Model) for Poultry for 3rd & 4th Phase NLUP chu nimin khan chief minister Lal Than­hawla'n Serchhip DC con­ference hall-ah a tlangzarh.

Lal Thanhawla chuan, hun kal tawh leh kal mek­ah ramin a mamawh ang zel programme leh policy-te Mizoramin a neih thu sawiin, "Ram hmasawnna leh ropuina atana Pathian lamṭang programme leh policy hruaitute'n an ngaihtuah chhuak ṭhin a, chu'ngte chu Pathianin nasa taka malsawmin, a kaihhruai­na duhawm tak hmuin, hlawhtlinna kan chang ṭhin hi a ropui a ni," a ti.

Rambuai laiin remna leh muanna policy neiin theihtawp an chhuah tih sawiin Chief Minister chuan, "Remna leh muanna kan neih hnuin eizawnna kawng tinrengah mipui kan harsat avangin eizawnna kawng ngêl­nghet siamna tur policy kan kalpui a, rim taka thawk hma late chu mi hlawhtling an ni," a ti a; NLUP dawngtute hlawh­tlinna chu an kutah a in­nghah thu a sawi.

NLUP Implementing Board chairman JH Roṭhuama, MLA pawhin thu sawiin, NLUP chu hleih nei loa kalpui a nih thu te, ramin a mamawh phuhru tura kalpui a nih thute leh mipuiin an hlâwkpui thute a sawi.

Integrated Management System (Kelkang Model) for Poultry-ah hian ar vulhtute chu vawi leh khatah an ar note dawn tur pe vek loin vawi thum pek an ni dawn.

Nimin khan ṭanpuina dawng tur mi 101 hnenah ar note 100 zel leh a chaw chi thum bakah, tui inna leh tui dah khawlnate pek an ni.